Wednesday, November 19, 2008

فيلم سخيف..وشيكولاتة


يعرض على الشاشة فيلم كئيب يحكي عن نهر للحب...وامرأة اكتشفت الحب فجأة مع رجل غريب عنها تمام...أتابع بغير اهتمام..اهتم اكثر بالشجار الكبير الذي احدثه الشباب الذين يقفون تحت بيتنا..لكن الشجار ينتهي للاسف قبل ان يبدأ..بعض الذين يحبون ان "يهدوا النفوس" انهوه


اعود مضطرة لمتابعة الفيلم الكئيب...عرفت الان انها متزوجة..وقعت في حيرة من امري..لا اعرف الان ان كان علي ان اتبنى افكار على غرار" الحب جنون"..و"الحب لايعرف المستحيل"..ام اذهب مع افكار مثل: الست ملهاش الا بيتها وجوزها...او..دي تستاهل حش رقبتها


لحسن الحظ لم تستمر حيرتي طويلا انهتها انا كارنينا او السيدة فاتن بانهاء حياتها تحت عجلات القطار وهي نهاية متوقعة لمعضلة معقدة كتلك...احمد الله كثيرا اني لم اكن اتابع باهتمام والا لانفجرت في نوبة بكاء طويلة...لم اعد احتمل هذه الاشياء


بالنسبة لي..افضل النهايات السعيدة..افضل ان ينتهي الفيلم بقبلة حارة بين البطل والبطلة...وان تكتب كلمة النهاية على خلفية من الالحان السعيدة... وان يتزوج البطل البطلة وينجبوا الكثير من الاطفال..لم اعد احتمل تعقيدات الحب التي تتفنن السينما في الكلام عنها...اعتقد اني اصبحت مسنة جدا على هذه الاشياء


لم اعد اقوى على متابعة قصص الحب العنيفة...تلك التي تحتوي على الكثير من الدموع والفراق والقتل احيانا..لم اعد اتحمل فكرة ان يحب احد ما ولا يستطيع الوصول لمن يحبه بسبب اشياء اقل مايقال عنها سخيفة ومبتذلة...على كل حال هي مشكلتهم لا مشكلتي


اليوم...اكبر مشاكلي هي..هناكل ايه النهاردة...او عايزين نخرج..طب هنروح فين؟


ربما بسبب ندرة المشاكل الجدية عندي...اغرق في مشاكل اصدقائي..اتعمق فيها..اتبناها..ابحث لمشاكل معقدة وغير منطقية على حلول بسيطة ومنطقية...بالطبع افرح عندما اصل لحل ما ولكن يتضح في النهاية انه ساذج جدا
احب حقا ان اغرق في مشاكل الاخرين...المشاكل العاطفية..والنفسية احيانا....ويبدو ان وجهي يوحي للاخرين بالراحة او بالاطمئنان فينطلقون في الحديث معي.. مع اني اعلم تماما اني اخر مخلوق على هذا الكوكب قادر على ان يحل مشكلة ما لاي احد..كل ماأقدر على فعله في تلك اللحظات هو البكاء مع من يبكون...كل ما استطيع فعله هو شراء بعض الشيكولاتة او الذهاب الى سينما تعرض فيلم كوميدي بصحبتهم...لابد ان يكون سخيف كذلك ولايحتوي على اي قضية تستحق التفكير او النقاش..ضحك وبس..لامانع كذلك من بعض الهرتلة


لا احب ان افكر بنفسي على اني حلالة المشاكل...هذا يعطيني طابع العالمة ببواطن الامور..المطلعة على الحياة..التي تعرف ماذا تقول ومتى تقوله...في الحقيقة انا ابعد مايكون عن تلك الانسانة..في الحقيقة مازلت تائهة ابحث عن درب اسكله لايحتوي على الكثير من المطبات الصناعية..ولايحتوي على ذلك الشئ الذي يفجر الدموع في العيون


فقط ان كنت تعاني من مشكلة ما استطيع ان اصحبك الى فيلم كوميدي سخيف لاتنتحر البطلة في نهايته بسبب تعقيدات الحب..فكما قلت لقد اصبحت مسنة على هذه الاشياء..وان لم يفلح ذلك استطيع دوما ان اشتري لك كمية محترمة من الشيكولاتة بالبندق
:)

16 comments:

يمامة شاردة said...

شيكولاتة!!

لاااااا .. ده توارد خواطر بأه :|

بجد أنا أول ما شفت الصورة قولت ايه ده؟فيه ايه؟

ما علينا :)

هو فيه حد يا بنتي مابيحبش فيلم نهر الحب؟

حاسوباتيه said...

اولا قومي لو سمحتي هاتيلي شوكولاته كتير لاني بحبها جدا جدا

ثانيا ايه ماقومتيش ليه مش بقولك هاتيلي شوكولاته وكبيره جالاكسي لو سمحتي

ثالثا انتي عارفه معزتك عندي صحيح ماشفتكيش وماتقابلناش بس فعلا انتي عندك موهبه جميله في الاستماع والتحيليل وبحب جدااااا اكلم معاكي وبقولك حاجات مش بقولها لحد تاني وانتي عارفه ده

رابعا زعلانه منك انتي مش كبيره ولا مسنه ولا حاجه انتي اموره وزي القمر وصغننه ويارب يارب يارب الحب يجيلك زي النسمه كده وتيجي بقى تشتكي مره وتكوني مبسوطه مره هو كده الحب بحالات غريبه جدا وتعدي تحكيلي وانا اعد اضحك عليكي

خامسا بحب جدا جدا الخناقات وبزعل قوي قوي لما تخلص بسرعه كده وحد يهدي النفوس بضايق منه مايتخانقوا خلينا نتفرج

بس كفايه كده عليكي كلام
واحشاني جدا

حمامة said...

درب اسكله لايحتوي على الكثير من المطبات الصناعية

ولا اعتقد بوجود طرق بدون مطبات عزيزتي :)


تصدقي انا كان نفسي اشوف الفيلم ده مع انى مبطقش الأفلام العربي وخاصة الابيض واسود بحس بهبل فيها
بس كان نفسي اشوف مدى التطابق بينها وبين انا كرنينا

انا معنديش مشكلة عاطفية اوى يعنى
بس ممكن تجيبيلي شيكولاته
انا لو ف القاهره على فكرة مكنتش هتنازل وبجد :D

soulmate said...

اولا زى ما كل الناس حتقول انتى خبطى فى الحلل يا بيسو فى حد ما يحبش نهر الحب دا انا بمووووووووت فيه بغض النظر عن حتة الخيانه الى فيه بس الراجل الممثل الكبير باين زكى رستم كان فيه لا يطاق الصراحه ما علينا مش كل الهوم بتداوى بالفرجه على فيلم كوميدى وضحكه من غير نفس احيانا بتبقى دواها انك تقعدى تتفرجى على فيلم رومانسى او كئيب فتقعدى تطلعى شحنة العياط الى جواكى فترتاحى احيانا ده بيبقى علاجى فى الحياه الدموع وعن طريقك الى جاى احب اقولك مش تستعجلى حتلاقيه والله انا متيقنه من ده وعندى امل فى الله كبير انك فى يوم حتحسى بالراحه الى بتتسنعيها قدامى بس على مين بالنسبه بقى للشيكولاته فياريت اتنين كيلو وانتى جايه انتى عارفه انا بحبها اد ايه الله يخليكى يا بيسو مش تنسينى واوعدك لو جيبتيها اجى اداوى المريض الى عندكو مخصوص عشان اخدها

smraa alnil said...

ولو انتي عندك مشكلة تيجي معايا سيتي ستارز
ونقعد ناكل في جار القمر مثلا ونتفرج علي المول ونضحك



فاكرة يا بسمة اليوم دة

بجد كان يوم حلو اوي وعمري ما هنساه

انتي بتغرقي نفسك في مشاكل الاخرين عشان انتي مش قادرة تواجهي مشاكلك انتي

اقفي لنفسك يا بسمة زي ما بتقفي لغيرك

بقولك ايه

ما تيجي نظبطلنا خروجة كدة انا وانتي البت اللي ما تتسمي هبة

بالمناسبة انتي وحشاني اوي

Desert cat said...

خدتى بالك يا بيسو لما كانت السيدة فاتن كل شوية غمض وتردد خالد مع صدى صوت علشان المشاهد يحس بمدى ذوبانها فى الاسم بس هو احنا ليه ما دوبناش مع الاسم اصل انا كمان مش بكب النوع ده من التراجيديا الغريب انه لما يتعرض وانا قاعدة مع اصحابى او افراد عيلتى الاقيهم متاثيرن وبيمصمصوا شفايفهم وزعلانين على الست فاتن وانا اقلب القعدة تريقه يتهمونى ان قلبى حجر مع انه قلب خصاية وحياتك
:)
استمعت جدا بالبوست وكتابته الشيقة
مودتى واحترامى

Unknown said...

انا هاجي اخد الشيكولاته

لم اعد اتحمل فكرة ان يحب احد ما ولا يستطيع الوصول لمن يحبه بسبب اشياء اقل مايقال عنها سخيفة ومبتذلة

انا كمان مابقتش بحبها

علي فكره انك تعيطي مع حد بيعيط ممكن تكون أكبر مساعده تقديميها له

اصحابك اللي بجد مش هم اللي بيضحكو معاك لما تضحك
هم اللي بيعيطو معاك لما تعيط

Hanan Said said...

جميل اوووي بجد البوست ده
وعلى فكره فلم نهر الحب فكرته بتستفذني
وبيستفذني ان المؤلف بيبقى عايزنا نتعاطف مع فاتن حمامه
ماعلينا

عارفه كمان
حكايه ان حد يحكيلك على مشاكلك دي ليها فعلا جانبيبن
لوقدرتي تحيلها بتكوني في غايه السعاده

واحيانا الواحد بيكون مش حمل مشكله يسمعها خالص
بس واجبه والي عود صحابه عليه
بيخليه لازم يسمعهم
وساعتها بيبقى حمل
لانه بيحس انه مش قادر يساعدهم

بس مافيش احلى من احساس الصداقه ده



وبعد ده كله مش هنسى طبعا
اني مضايقه وعايزه شيكولاته

سلام يا حببتي

basma saghir said...

يمامة
تقريبا هو توارد خواطر..اصل انا عندي الموهبة دي
هو مش مش بحبه بالضبط قوي يعني...بس تقدري تقولي ان الفيلم ده بالذات بيوترني جدا

جوجو
اولا:انتي تؤمري يافندم

ثانيا:مانا هقوم اهو بس هو ينفع حجاة غير جالاكسي اصلها غليت قوي واحنا في اخر الشهر

ثالثا:اه يا هاجر عارفة والله وانتي كمان عزيزة عندي

رابعا:لأ ياهاجر انا كبرت..قلبي من جوة كبر..يمكن من برة زي مانا بس من جوة كبرت..وبعدين انا عمري ماهشتكي هو اللي هيشتكي بعون الله :)

خامسا: ناس رخمة قوي بصراحة
وانتي كمان وحشاني وبقالي كتير متكلمتش معاكي يارخمة...اظهري بقى شوية


حمامة
هو مفيش انا عارفة انه مفيش بس بعض الامنيات مش هتضر...ولا ايه
والله ولا انا بطيقها الا فيما ندر زي افلام اسماعيل ياسين مثلا لان ساعات بتبقي عايزة تضحكي وبس من غير تفكير..بس فيما يخص التطابق بقى هو تقدري تقولي عليه متطابق الى حد ما
ياسلام بس كدة شيكولاتة..جيتي في جمل يعني..اجيبلك وماله ومش عزومة مراكبية خاااالص ومش علشان انا عارفة انك مش في القاهرة..نهائي يعني :)

شوشو
اه انا مش بحبه..هو بيوترني اكتر من اني مش بحبه ده غير اني اصلا مش بحب فاتن حمامة..بحس انها ست زيادة عن اللزوم كدة...لأ ياست شوشو انا بطلت اتفرج على افلام نكد خلاص..طريقي انا عارفة اني هلاقيه ولو ملقيتهوش عادي بتحصل في احسن العائلات
على فكرة انا كويسة قوي وانتي بيتهيئلك..هو انا مش كويسة قوي يعني بس والله بحاول اكون
مستنياكي علشان المريض بقى قتيل خلاص

انوج
اااااه فاكرة..بقالي حبة كتير كدة مخرجتش خروجة حلوة زي دي والله يانوجة
صدقيني بحاول اقف لنفسي بس الغريبة اني بقع كتير قوي فا لقيت من الاسهل اني اقف لغيري
هنضبط صدقيني..محتجاها جدا
انتي وحشاني اكتر

desert cat
اه اخدت بالي وجالي شلل نصفي الحمد لله..وانا والله بقلبها تريقة علشان الشلل ميكملش على النص التاني
:)
منوراني والله

اسراء
انا كدة هفلس بسبب الشيكولاتة بس علشان خاطرك كله يهون :)
طول عمري مش بحبها بس هي الدنيا كدة
انتي معاكي حق على فكرة..على كدة اانا صديقة اكتر من جيدة :)

حنان سعيد
ااااااه المفروض انها خاينة وكدة ولازم تتضرب بالشباشب عقابا على فعلتها يقوموا الناس في الاخر يعيطوا عليها لما تموت
انا بحس لما حد بيحكيله مشاكله بالحمل اه بس مش علشان انا مش قادرة اسمع المشكلة بالعكس انا ببقى محتاجة اغرق في مشاكل غير مشاكلي..بس بحس بالحمل علشان بحس انها امانة واني لازم الاقي حل

وغالبا انا هفتح مصنع علشان اكفي طلبات الشيكولاتة اللي في البوست ده لوحده :)
نورتيني

FOrty said...

احلى حاجه زكرتيها هى الشيكولاته و يا سلام لو كانت بالبندق و الزبيب
اما الفيلم الرخم ده انا بكرهه من زمان بس محاضرات و طريقه فى القاء زكى رستم فيه كانت ايه حكايه

إيمان قنديل said...

مافيش احلى من الشيكولاته بتنزل الضغط وتهدي الأعصاب

momken said...

هما بيقولوا ان الفليم من كلاسيكيات السينما المصريه

ومن الواضح ان انا كمان ماليش فى السينما


(ممكن حتته شيكولاته؟)

البوست حلو اوى

تحياتى

basma saghir said...

overforty
مبحبش الزبيب..بس بحب البندق جدا :)
ولا انا بحبه بس زكي رستم كان فعلا مبدع فيه الفيلم ده

مكسوفة
نورتيني والله..وهي فعلا الشيكولاتة دوا للنفس العليلة :)


ممكن
ولا انا بصراحة ليا في السينما اللي بالشكل ده :)

وبعدين ايه ده؟
ممكن حتته شيكولاته؟)

انت بتمدح في نفسك قوي كدة ليه..هو انت للدرجة حلو لدرجة الشيكولاتة يعني؟ :)

Mahmoud said...

ازيك يا بيسو
طب الفيلم اسمه ايه
عشان انا بحب النهايات اللى بينتهى تحت عجلات القطار و فى ازمنه الكوليرا المهم البطل يموت و البطله كمان و حبذا لو المخرج و المنتج و ياه ياه لو التليفيزيون فرقع فى وش اللى بيتفرج ليصنع جوا رومانسيا جميلا مع الدخان المتصاعد بفم فلتر

ابو على said...

ياه هو فيه حد مبيحبش ايزيس وازوريس

على فكره النهايات مبتبقاش بايدك انتى
انتى وحظك
وبعدين بقى ايه حكايه الشيكولاته معاكى مع النهايات السعيده
طيب هو مينفعشى ايس كريم يعنى؟؟
جيلاتى بربع جنيه؟:d
لازما يعنى جلاكسى ام تسعه جنيه دى
يلا مستنى منك الفلم القادم:d
قصدى البوست الجديد
تحياتى

basma saghir said...

Roiter
اسمه يافندم نهر الحب
وياحبذا او المتفرجين كمان علشان ملهمش لازمة

ابو علي
انا مش بحبهم ياعلي..ومفيهاش حاجة على فكرة اني محبهمش
معاك حق..النهايات بتبقى حظك يا محظوظ
لازم لازم لازم جلاكسي..مقدرش استغنى عنها