Thursday, February 28, 2008

لمة بنات



  • ايه رأيك في اللوك الجديد؟
    تجنني والله
    بجد؟
    وحياتك عندي تجنني
    طب تعالي اضبط نفسي في الحمام شوية قبل ما يجي
    بقلك تجنني
    معلش..انا خايفة يتصدم لما يشوفني
    ..................................................


  • بجد نفسي اتجوز واحد طويل وعريض
    لأ..بلاش تقولي كدة
    ليه..دي احلام
    برضو بلاش..كل الي اتمنوا كدة اتجوزوا واحد قزعة وقصير
    !!!!
    ...................................................


  • عايزاكي تنزلي معايا بكرة
    على فين العزم ان شاء الله
    عايزة اشتري جزمة
    تااااااني؟...انتس مش لسة مشترية واحدة من اسبوع
    عادي بقى..انا مريضة بالجزم وانتي كصديقة واجبك انك تقفي معايا
    ربنا يشفي
    .....................................................


  • كلمني...شكرا
    انتي مش هتبطلي الرسالة دي بقى...يارب يلغوها
    ايييييه في ايه مكسلة اقوم من تحت البطانية واكلمك
    يعني انا الي مش مكسلة

  • اه بس انا ارفع منك بكتيير والبرودة بتأثر فيا اكتر منك

  • افحمتيني بصراحة

  • ميرسي
    .....................................................


  • الواد ده أمور قوي
    الا صحيح قوليلي
    خير؟
    هي أمور بالالف ولا بالقاف؟
    ربنا يهديكي ياحبيبتي ارحمي امي بقى
    ................................................................


  • خسي شوية بقى علشان تبقي زي المزة دي
    مين قالك بقى اني عايزة ابقى مزة؟
    كل البنات عايزين يبقوا مزز
    طيب شايفة الراجل ده؟
    ماله؟
    اراهنك انه لما هيعدي هيعاكسني
    لما نشوف
    "أموت انا في الشكولاتة"
    شفتي...يابنتي انا مزة كما خلقت المزة لتكون
    ................................................................................


  • كلميها بقى...عايزين نروح نباركلها وبالمرة نتفرج على شقتها

  • طيب على اخر الاسبوع كدة
    ااااه وبالمرة نشوف الي بيتجوزوا دول شكلهم
    ايه يابت الحرمان ده...عمرك ماشفتي حد متجوز
    لا بس دي وضع خاص
    اشمعنى؟
    علشان دي من شلتنا....وكل سنة وانتي طيبة..ويارب بقى فك عقدتنا
    ههههههههههههههههههههههههههههههههههه
    ........................................................................


  • بحب محمد منير قوي في اغنية لولا السهر
    اشمعنى؟
    علشان لما بيقول: النجمة البعيدة..شافتني وحيدة جات تسأل عليا وباست عينيا..قالت لي حبيبك باعتلك هدية..بيقولك بحبك قد الدنيا ديا...قالتلي حبيبك باعتلك هدية بيقولك بحبك.بحبك..بحبك قد الدنيا ديا...بحس انه بيقولي انا بحبك
    ياضنايا يابنتي..صعبتي عليا...بحبك بحبك بحبك
    .............................................................


  • هو بيبصلي كدة ليه؟
    عادي ياماما...يمكن معجب ولا حاجة لاسمح الله
    ايه ده....ده جاي علينا
    "لو سمحتي فين شؤون الطلبة"
    المبنى الجاي
    "شكرا"
    مش قلتلك معجب..معجب جدا
    ههههههههههههههههههههههههه
    .........................................................................


  • انا تطنشني ومتردش عليا...بس لما اشوفها
    يمكن ما اخدتش بالها
    لالالالا بجد بجد لن انسى لها هذا الموقف..ده احنا عشرة 6 سنين..كدة عيب
    طب وريني الموبايل كدة ونحاول نكلمها تاني
    كليمها انتي..انا لساني مش هيخاطب لسانها ليوم الدين
    ايه ده؟
    في ايه؟
    ده مش رقمها يا اذكى اخواتك
    مش رقمها...انا خبطت في الحلل مش كدة؟
    حكمتك يارب!!!

    ..........................................................................


  • تعالي بقى نروح جيم ونلعب ايروبيكس شوية
    ياصلاة النبي..مين الي هيعمل كدة ان شاء الله
    احنا
    اااااه..مع نفسك ياماما
    يابنتي خليني نروح نفك الكبت الي عندنا شوية بدل ماننفجر
    كبت ايه بس يا حبيتي..دي كلها اوشاعات
    مفيش كبت يعني؟
    لا
    أمال ايه كمية الاكل الغريبة الي عمالة تاكليها دي؟
    ايه جعانة
    ..........................................................................


  • على فكرة انا بحبه قوي وكل حاجة بكتبها بكتبها عليه
    دي حاجة كويسة وظاهرة صحية على فكرة
    لا انا حاسة اني مش كويسة..حاسة اني بتسحب..بتخطف
    وليه كل ده؟
    بحبه
    المصيبة بقى انه عبيط ومش دريان
    اه هو فعلا عبيط
    ..........................................................................


  • عارفة نفسي في ايه في عيد الحب الجاي
    استغفر الله العظيم..في ايه؟
    نفسي في معجب مجهول يبعتلي كل يوم في ورد احمر...وهدايا مش لازم تكون غالية قوي بس اكون بحبها..وانا اعمل نفسي متنرفزة بس من جوايا هبقى طايرة من الفرح...مش انتي كمان نفسك في كدة؟
    ياحبيبتي كلنا نفسنا...بس للاسف محدش بقى يفكر كدة..بدل فلوس الورد هيقول ما اجيب بيه حاجة تنفعني احسن ولاحتى اتنين كيلو تفاح
    منك لله...انا غلطانة الي بتكلم مع واحدة زيك
    ..........................................................................


  • معرفش ليه حاسة اننا مش هنكمل مع بعض
    ليه...مش هو ده الي كنتي بتقولي فيه معلقات؟
    مش عارفة بقى..مفيش اي نوع من انواع الحوار بينا
    خالص

    خالص؟..
  • .المفروض اني ابقى اقرب انسانة ليه..بس هو حتى الحاجات الي مضيقاه مش بيرضى يحكيهالي
    يمكن من عايز يضايقك ويشغلك
    محدش قاله يعمل عليا وصي..وانا مش تمثال كريستال هيتكسر مع اول مواجهة مع المشاكل..انا جامدة
    اقلك...ابعتيله جواب
    تصدقي فكرة...بس يارب ميقولش عليا هطلة
    ههههههههههههههههههههههههههههههه
    ........................................................................


  • هنجيبلها ايه بقى؟
    نجيبلها ايه في ايه...مش فاهمة
    يعني هندخل عليها وايدينا فاضية...ميصحش
    انا مش هدفع اكتر من عشرين جنيه..اه...انا مش حمل المصاريف دي
    يخرب بيت النتانة ياشيخة
    مانتي اصلك مش فاهمة حاجة
    وحياة ابوكي تفهميني
    مهو انا لازم اجيب طقم جديد البسه وانا رايحلها..مش معقولة هروحلها بطقم قديم..علشان الواحد برضو يدخل بقيمته وكمان علشان متشوفش نفسها علينا وتفتكر نفسها ياما هنا ياما هناك علشان اتجوزت
    يخرب بيت دماغك..فيها ايه دماغك دي..جزمة قديمة؟
    .............................................................................



  • انتي يابت انتي على فكرة مبتعرفش تلبسي
    اشمعنى؟
    ايه الي انتي لابساه ده؟
    ماله...عادي يعني
    عامل زي لبس فاتن حمامة في مسلسل ضمير ابلة حكمت...انا لازم اعملك تغيير جذري في شكلك العفش ده
    تصدقي بالله...فكرتيني بجويل في برنامج بالصراحة احلى
    ههههههههههههههههههههههههههههههههههههههه
    ....................................................................................

    الو
    ايوة
    ايه ده....مال صوتك...انتي معيطة؟
    لا
    تبقي معيطة...مالك؟
    تعبانة قوي..حاسة اني لوحدي خالص..محدش معايا
    لوحدك ازاي يابطة...واحنا رحنا فين...بطلي هبل وحياة ابوكي
    انا بحبك قوي على فكرة
    وانا كمان بحبك على فكرة
    ........................................................................


  • نفسي افرح..مش عارفة افرح...كل حاجة حواليا بتخنقني..حاسة اني بقيت لوحدي من ساعة ماسابني..ضعيفة..هشة قوي..كل حاجة بتجرحني
    يابنتي ابوكي ده من اهل الجنة وهيبقى جار الرسول ان شاء الله علشان ربى بنتين واحسن تربيتهم
    يارب
    الله يرحمه
    وليه بقى البوسة دي؟
    مش عارفة..يمكن صعبتي عليا...ويمكن بحبك..ويمكن من غير سبب خالص
    ميرسي
    اي خدمة
    .................................................................



  • بسمة...بسمة...بتعملي ايه؟
    ولاحاجة..بكتب كل كلمة بنقولها
    ليه يابت..ناوية ترفعي علينا قضية؟
    لا..بس حاسة انكم مهمين قوي لدرجة اني اكتب كل حاجة احنا بنقولها...وانا بحبكم
    ايه الكلام ده يابت...انتي بتقولي شعر
    والنبي والنبي متبوظوش اللحظة الشاعرية دي
    شاعرية بالسكر...هع هع هع هع هع هع هع هع
    ......................................................................

Thursday, February 21, 2008

ليلة ما


مقهى نجيب محفوظ في حي الحسين
الثامنة والنص مساء


جو من الحميمية الشديدة يغلف المكان...ودخان معسل التفاح والعنب متجمد في هواء المقهى كأنه سحب صغيرة...ومجموعة من الناس المختلفين اتفقوا على امضاء الامسية في رواية لنجيب محفوظ...والدفء يتسلل الى ارواحنا ويجعلنا نحلم بعوالم اخرى ....وكلما ازدادت البرودة في الخارج..ازددنا دفئا


يأتي الصوت النشاز-لكن المحبب- لعازف القانون وهو يتغنى باغنية ما لام كلثوم..يغريني صوته بأن اضع ساقي تحتي وارمي برأسي على كتف من يجلس بجانبي واستغرق في نوم عميق بلا احلام ولكن تتخلله اغنية لأم كلثوم...واتذكر اني كنت احسبها رجل وانا صغيرة لقوة صوتها


مقهى لنجيب محفوظ...اعجبتني الفكرة ربما لاني معجبة بنجيب محفوظ وربما لان المقهى قطعة من حارة نجيب محفوظ التي اعشقها وربما لان فكرة ان تدب الحياة في رواية له استهوتني
تملئ صوره المكان..وتتناثر رواياته على كل رف وكل طاولة وهي بالتأكيد ليست ديكور فارغ ولكنها روح المكان فتبدو الروايات في ايدي رواد المقهى اجمل من اي وقت مضى


وصل السحلب الذي طلبته اخيرا..لم تكن اول مرة لي في شرب السحلب ولكنها كانت المرة الاولى التي اشرب شيئا يتسرب الى الروح بتلك السهولة...يبعث فيها الدفء ويذكرها بأشياء كانت قد نسيتها او تناستها منذ زمن
انضم عازف الرق بصمت لعازف القانون-قانونجي كما يطلق عليه ابي-وبدخلوه الى النوتة استطعت ان اميز ان الاغنية هي حيرت قلبي معاك...


سرعان ما تشغل جميع الطاولات في المقهى...روادها خليط عجيب من البشر منهم مصريين..خليجين...وغربيين من جميع الجنسيات
يصر ذلك الولد الاشقر الذي حسبته في بادئ الامر اشيب الشعر ان يرقص على عزف القانون...فتنهره امه بلغة لا اعرفها ولكني اعرف من لون شعرهم الاشقر الاقرب الى البياض...وبشرتهم شبه الشفافة وعيونهم التي بلون السماء ولون خضرة الاشجار ...انهم من احد تلك الدول الاسكندنافية الباردة وانهم اتوا الى هنا بحثا عن الدفء الذي يتسرب الى الروح مثلي


تزداد سحب الدخان مع زيادة اعداد المدخنين ولكن لا احد يبالي ولا احد يعترض...فقد وقعنا جميعا تحت سحر ذلك المقهى وذلك القانونجي وتلك الروايات التي يضعونها على الطاولات على سبيل الفخ للزبائن...ولكني كجميع من في المقهى ارحب بذلك الفخ...ارحب بذلك الجو...ارحب بالسحلب وبرائحة معسل التفاح...ارحب بالنظرة البلهاء على وجوه السائحين وهم يستمعون الى اغاني ام كلثوم...ارحب بالاثار التي تتركها سهرة كتلك السهرة على ارواحنا...ارحب بالسعادة التي تتسلل ببطئ و خبث الى قلوبنا...ارحب باعادة اكتشاف الاشياء البسيطة في حياتنا

Tuesday, February 12, 2008

وبدأنا في التاجات

أول تاج في 2008 من بوس بوس...واكيد مكعبل مهو الغرض الاساسي من التاجات انها تكون مكعبلة ومعقدة لو كنت اقدر اقول كدة هما في الحقيقة تاجين مش واحد وده من كرم بوس بوس وسخائها

اول تاج سؤال واحد بس

اذا تقدم لكي رجل مطلق هل ستقبلين به عريسا؟؟
بس هو يجي اصل العرسان شاحة اليومين دول... اما بقى موضوع انه مطلق معتقدش اني هقدر احكم عليه من غير ما اعرف اسباب الطلاق الاول..السبب منه او منها..عاشوا مع بعض قد ايه وليه فكروا في الطلاق كحل اخير...ساعتها بقى ممكن اخد قرار بالقبول او بالرفض...بس مقدرش ابدا ابدا احكم عليه انه انسان وحش من غير م اعرف كل الحاجات دي اذا كنت انا بلوم الناس الي بتبص نظرة دونية للمطلقات وبتعتبرهم خطر داهم على المجتمع فا اعتقد ان الوضع مش هيختلف مع الرجالة ....مش برضو عندنا مساواة بين الجنسن.قولوا مش عندنا...طبعا عندنا


التاج التاني بقى شوية اسئلة اكثر تكعبلا من السؤال الي فات


هل توافق على حزف خانة الديانة من البطاقة الشخصية ؟
لا طبعا مش هوافق ابدا...فخورة جدا اني مسلمة


ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
رايي ان دي حاجة منافية لفطرة ربنا سبحانه وتعالى...وبجد مش عارفة اذا كان ده مرض نفسي ولا دي ناس بتستعبط..معتقدش ابدا انها حرية شخصية لاننا مش احرار حرية مطلقة مهما كانت مساحة حريتنا وانا واثقة ومتأكدة ان الي بيعملوه بيزعل ناس كتير وبيأذيهم وقبل اي حد ربنا سبحانه وتعالى..
اوافق او موافقش هما موجودين ودي حقيقة...مليش اصحاب ومش عايزة يكون ليا ..متشكرة جدا


هل تعتقد بوجود إضطهاد للمسيحين فى مصر ؟
فين ده؟؟ !!


من هو الشخص الذى تختارة لرئاسة مصر ؟
بكل حرية وبكل صدق وبكل اعتراف بالجميل للي حصل وللي هيحصل..السيد الاستاذ الرئيس حسني مبارك ومن بعده السيد الاستاذ الرئيس برضو نجل سيادته جمال مبارك
يخرب بيت دي اسئلة انتو عاوزين تودونا ورا الشمس شكلكم كدة


إذا قت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟هل توافق على مشاركة كل من : الإخوان المسلمين - الأقباط فى الحكم ؟
كبير قوي الموضوع ده عليا..بس لو ده حصل ممكن اعمل رباطية بقى واعيش في برج عاجي او برج القاهرة واعين قرايبي وقرايب قرايبي وجيرانهم وحبايبهم واصحابهم وولادهم وصحاب ولادهم .... هخرب البلد يعني وهيبقى النصر لحلل الكوسة وصواني الكفتة مش زي دلوقتي خالص يعني
هوافق طبعا على الاقباط والاخوان المسلمين..مش احنا كلنا في مركب واحدة ولا ايه... ومحدش هيقدر يفتح بقه معايا والي هيفتح بقه هحاكمه محاكمة عسكرية..ويعدم


فى رأيك الشخصى .. ما هى أفضل مدونة على بلوجر قمت بزيارتها ؟
يووووووه في كتير وفي مجالات كتير وكل مجال فيه ناس كتير...يعني لو عدتهم مش هخلص


اذا تزوجت وأنجبت ولدين وبنتين .. أى الأسماء تحب أن تسمى ؟
كل شوية يعجبني اسم شكل واقول خلاص هو ده..بس اخاف لحسن الراجل الي هيتجوزه يكون بيحب ماماته ولا حاجة وهي يكون اسمها عطيات ولا فتاكات ولا ست ابوها ولا اي اسم منيل فوق دماغهم ويبوظ كل احلامي وتطلاعاتي
طيب...علشان بس ميزعلش مني
البنات: فتحية..جمالات..نحمدو..سعدية
الاولاد:مرسي..زينهم..عطوة..عبد الجبار

هل تعتقد أن توريث الحكم فى مصر . . سيتم فعلا أم لا ؟
بيهرجوا دول ولا ايه...طبعا يلي بتسأل انت ده شئ مؤكد واحنا نتمنى ان سيادته يحكمنا بعد سيادته ما ربنا يكرمه ويسكنه فسيح جناته...هو احنا نطول

شكرا يابوس بوس