Monday, April 21, 2008

سر الحياة-حاجات وبتفرح


الشمس ساعة الغروب..والقمر في نص الشهر العربي..النجوم...والغيوم لما تبقى كتيرة... نسمة باردة في يوم حر...الورد البلدي الاحمر لما يبقى مندي...الكوربة الصبح بدري..وريحة القهوة الي جاية من ميدان الجامع..


المصاصة الحمرا الي اخرها في لبانة..الشوكولاتة بالبندق...عصير المانجة في اغسطس..القطط اول ما تتولد..رسالة على الموبايل بتسأل عن الحال..مقابلة حد بنحبه من غير معاد


فيلمك المفضل في اخر يوم متعب...كراسة رسم فاضية والوان خشب...فنجان قهوة الساعة ستة الصبح...تلعب مع ناس اصغر منك ب 17 او 18 سنة كانك اصغر منهم ب17 او 18 سنة...تشكي همك لطفل مكملش سنة ونص وهو بيضحكلك ومش فاهم حاجة..


تسمع منير وفيروز في ساعة صفا...تلاقي حد يحبك وانت شعرك منكوش وعينك حمرا ولسة مغسلتش سنانك...تعمل حاجة لأول مرة من مدة طويييييلة جدا...تتكلم من غير ما تضطر تفكر الف مرة قبل ما تنطق...تبقى سعيد انك انت


تلاقي في حزنك ايد تطبطب عليك...وتلاقي في فرحك حد تقوله قد ايه انت فرحان...تحل مشكلة لحد قريب منك....ليلة العيد لما يبقى حيلنا مهدود من التنظيف ومع ذلك سهرانين بالبيجامات الجديدة مع مج كاكاو....البلالين الملونة..وصوت البمب الصبح...تكبيرة العيد ولما تحس ان الناس فجأة بقت واحد


تحلم حلم بليل وتصحى الصبح تلاقيه اتحقق...تسمع كان في فراشة صغننة بتاعة نيللي وتلاقي نفسك لسة حافظها...مكالمة بعد نص الليل مع حد قريب منك في اي كلام عبيط...


اسكندرية في اخر شهر مايو...شارع خالد بن الوليد بعد الساعة 9 بليل...المنتزه وقلعة قايتباي...مكتبة الاسكندرية...محطة الرمل...البحر الصبح...والبحر بليل...البحر في كل وقت


موسيقى هادية...ولب ابيض..وعصير تفاح...وبلكونة...الساعة واحدة الفجر


فاروق جويدة...نزار قباني...عبد الرحمن الابنودي..احمد فؤاد نجم...رفعت اسماعيل والبدلة الكحلية التي تجعله فاتنا...صلاح جاهين...سعاد حسني وخلي بالك من زوزو...الساحرة الصغيرة...صغيرة على الحب...ميكي ماوس ودونالد دك....توم وجيري


حديقة الازهر بعد المغرب...سما ومحمود وهما بياكلوا ايس كريم...انا وخالتو ومج الشاي بلبن بتاع اخر الليل
دريم بارك..والصريخ والضحك الي من القلب...غزل البنات البمبي...وسباق السيارات...والسفن اب الي بيدلق على الهدوم ومش بيبان علشان هو شفاف


لما تصحى قبل القجر وتقعد تتكلم مع ربنا وتشكيله همك وبعد ما تخلص تحس انك ارتحت...لما يبقى في حد واحشك قوي وبتفكر فيه كتير وتشوفه...الميني باص الي بيروحني البيت لما بيبقى فاضي واقعد من اول المشوار


لوزة و شيماء و هبة و ريهام و رشا و دعاء و نادين و هاجر...البت جوري بنت حسن وهدى... مهند ومحمود....الثلاثي المرعب..سماء ومريم و شذى...


دكتور ممدوح عبد العليم..اخر الرجال المحترمين....ابلة حنان...دكتور حسن غلاب الله يرحمه...ابلة فتحية....دكتورة ايمان السعيد...ابلة منال...دكتور احمد منصور...ابلة اسماء..دكتور الطيب محمود ..ابلة نوال...


المرجيحة الي بركبها في حديقة الازهر من غير ما حد اعرفه يعرف....اشوف كذا فيلم في السينما ورا بعض مع حد بحبه...مكتبة ديوان لما يبقى معايا فلوس.


تيمون وبومباو هاكونا مطاطا


ومنير لما بيقول:
مش كل شئ بيفوت في عمرنا بيجرح
قلب الحياة مليان..حاجات وبتفرح

28 comments:

حاسوباتيه said...

اول تعليق الحمد لله يارب كده على طول
بصي بجد راااااااااائعه رااااااائعه بالزات في حتتين عجبوني قوي اول حته

تسمع منير وفيروز في ساعة صفا...تلاقي حد يحبك وانت شعرك منكوش وعينك حمرا ولسة مغسلتش سنانك...تعمل حاجة لأول مرة من مدة طويييييلة جدا...تتكلم من غير ما تضطر تفكر الف مرة قبل ما
تنطق...تبقى سعيد انك انت

حلو قوي دي وبالزات حد يحبني وانا بالمنظر ده والي ممكن اعمله من فتره طويله ماعملتوش اني اتمشى على النيل بقالي كتير ماعملتش ده وبشوفه من شباك العربيه بس تصدقي نفسي المسه كمان
حكايه اني بكلم من غير ما افكر فده بعمله معاكي وانتي عارفه كده كويس

تاني حته بقى هي
لما تصحى قبل القجر وتقعد تتكلم مع ربنا وتشكيله همك وبعد ما تخلص تحس انك ارتحت...لما يبقى في حد واحشك قوي وبتفكر فيه كتير وتشوفه...الميني باص الي بيروحني البيت لما بيبقى فاضي واقعد من اول المشوار

فعلا عارفه لما بعمل كده بحس براحه غريبه ساعات حتى بكون مش عملت كده من فتره كبيره وبكسف قوي من ربنا اني يعني بقالي فتره بعيده عن ربنا بس لما بعمل كده بحس اني قريبه منه قوي قوي برغم اني كنت بعيده وبزعل قوي اني ببعد بس بحس ان ربنا بيسامحني واني قريبه منه قوي

وانا فعلا لسه حاصلي امبارح بس شفت بنت خالتي الي بحبها قوي وكان بقالي فتره ماشفتهاش وكمان شفتها وهي حامل اهي وكان شكلها عسول وقعدت اضحك عليها جدا وحضنتها جامد لانها كانت واحشاني فعلا
بالنسبه للمني باص انا بركب باص اصلا علشان بسافر

بيسو بجد بوست رائع كالعاده طبعا وخلاني يعني مبسوطه قوي فكرتيني بحاجات كتير حلوه بالتوفيق يارب

Camellia Hussein said...

ايه الجمال ده:)

Desert cat said...

ايه الاحساس ده كله ما شاء الله والله كلها مواقف جميلة والاجمل ده
تلاقي في حزنك ايد تطبطب عليك
وكمان الكوربة فى الصبحية
حسيت بحنين رهيييب معلشى بقى ذكريات خليها فى سابع نومة احسن

nadine said...

بيسو
مبسوطة انى من ضمن الناس اللى بيفرحوكى
عشان انت كمان حد بينسينى زعلى لما بكلمك
بجد يا بيسو انتِ بجد حد جميل قوى

اما بقى عن البوست ككل
اجمل حاجة انك تفرحى من حاجات بسيطة حواليكى
يعنى ماتطريش تعملى مجهود عشان تتبسطى
يكفى مج شاى بلبن فى البلكونة مع منير بالليل عشان يوزرك الإحساس الجميل ده بالرضا والصفاء الداخلى

بجد بوست حلو، بسيط قوى و حقيقى قوى

dyin_soul said...

بت يا بوسي

بجد وحشاني و مبسوطة جدا من البوست ده و الي قبله

طبعا تأخيري في التعليق مش من منطلق ني عروسة و عايشة الدور و الكلام الفاضي ده
ولا كمان عشان مشغولة مع طارق ده هو كمان قرب يذهأ مني

التتار مشيوا من عندنا و ماما وانا لسة لابسة الفستان قالتلي ادام طارق جهزي عدة الشغل عشان نشيل اثار الدمار

بت يا بوسي هقولك حاجة انتي عارفاها

انا بجد بحبك أوي

بس الي متعرفيهوش اني كل يوم بجد بحبك اكتر من الي قبله

عارفة ان الحياة فيها حاجات كتير حلوة غير الي قلتي عليها

بوستات بوسي الي بتوصل للقلب بسرعة

القعدة مع بوسي في كافيهات الكوربة

التمشية في مدينة نصر

بجد يا بت انتي ملكيش حل و ربنا يسعدك

ابو على said...

نسيتى تمثيليه ذئاب الجبل وسوق العصر والوسيه بالمره:d

بيسوو said...

حاسوباتية
انتي تتحبي بأي منظر على فكرة بقى والي ميحبكيش وميسألش عليكي يبقى عبي...ولا بلاش الطيب احسن :)

اتكلمي مع ربنا كتير ياهاجر..ربنا حنين قوي..وقريب قوي...يارب تلاقي السعادة دايما

كاميليا
مش اجمل منك..:)

قطة الصحراء
وليه تخليها في سابع نومة..صحيه..صحيه :)

نادين
انتي عارفة اني بحبك..مش كدة؟
واني بقالي فترة طويلة مفتقدة نادين القديمة بتاعة زمان بس الحمد لله ابتدت ترجع تاني ودي خليتني سعيدة قوي..انتي اكيد من الناس الي بيفرحوني...الناس القليلين جدا
طول عمري اقل حاجة تبسطني وترفع معنوياتي بس الظاهر اني نسيت الموضوع..والحمد لله اني افتكرته تاني..يعني تعليق زي ده فرحتي جدا جدا جدا


هبة
واخيار ظهرتي على الساحة
والله ياهبة انا متأكدة انك مش هتعرفي تلعبي دور العروسة كويس ابقي تعالي وانا اديكي كورسات ازاي بقى تتعاملي مع البشر من منطلق انك عروسة خلاص وبتاع...والحمد لله ان الهكسوس مشيوا بالسلامةانا كنت متأكدة انك هتصمدي في وش العدوان الغاشم ده

بت يا بوسي هقولك حاجة انتي عارفاها

انا بجد بحبك أوي

بس الي متعرفيهوش اني كل يوم بجد بحبك اكتر من الي قبله


ياسيدي..ياسيدي على الكلام الي يدوخ.لأياستي انا مقدرش على كدة :)
ربنا يسعدك على طول ياهبة وخلي بالك من طارق..انتي عارفة رايي فيه كويس


ابو علي
لألألأ..ذئاب الجبل ايه..ممكن تقول..مسرحية ريا وسكينة..ومسرحية المتزوجون..والواد سيد الشغال..دي حاجات اساسية جدا لعلمك

بيسوو said...
This comment has been removed by the author.
سكينة said...

أيوه هو ده الكلام المضبوط
لسه الحياة مليانة بحاجات وساعات تفرح إن شاء الله
وطبعا مش عايزينها نفس اللي فات
لينا رب اسمه الكريم
في عز ما انا مخنوقة المصاصة الحمرا ام لبانة ما زالت بتسليني
:)

حمامة said...

مش كل شئ بيفوت في عمرنا بيجرح
قلب الحياة مليان..حاجات وبتفرح


وبرضه لما تلاقى حد بيحب حاجات كتير زيك اكيد بتفرحى :):)

الفجر والبحر والنجوم
فاروق جويدة ونزار قبانى
كان فى فراشة ضغيره
فيروز وهى بتغنى يارا وحبيتك ف الصيف
الكاكاو والشاى بلبن والمراجيح اللى هاموت واركبها بقالى كتير
دريم بارك بصريخهاودوختها

انتى جميلة :)

FaceMoon said...

الله بجد تحفة تحفة تحفة
قولتى كل الكلام اللى بيفرحنى وكل اللى نفسى احسة ولما بيحصل بحس انى طايرة لدرجة انى حسيت ان انا اللى كتبت بهنيكى ودى اول زيارة ليا ومش حتكون الاخير
تحياتى

esraa said...

معلش انا مش هعلق علي الموضوع

ادخلي علي اللينك ده وانتي هترعفي ان اسراء نفسها اتصدمت لما شافت كلامها بعد ماخرجت

http://www.facebook.com/note.php?note_id=11799039593&ref=nf

TheRiddle said...

الله الله الله
أقل كلمة واكبر وصف اقدر اصف بيه الله على التوبيك بجد
تصدقى اول مرة اشوف توبيك فى مدونة بالجمال ده
دي اول مرة ادخل فيها المدونة
بس اكيد مش آخر مرة
تمنياتي ليكي بالتوفيق
الى الامام دائما

bluestone said...

انك تلعب مع ناس اصغر منك ب 17 او 18 سنة كانك اصغر منهم ب17 او 18 سنة...تشكي همك لطفل مكملش سنة ونص وهو بيضحكلك ومش فاهم حاجة..

انا بعمل كده كتييييير :)

امرأة تقول الذي لا يقال said...

انتي هايلة
بجد


مش كل شئ بيفوت في عمرنا بيجرح
قلب الحياة مليان..حاجات وبتفرح

JoJosho said...

See Please Here

Tamer Nabil said...

الايام الجميلة


مخدش يقدر ينساها


تحياتى

fatma said...

الله عليكى يا بيسو
حلوه قوى قوى قوى بجد
لا والله العظيم عجبتنى
جميلة جدا قوى خالص موت

fatma said...

ليكى عندى تاج

nanooo2100 said...

هاااي
انا بجد عجبني مووووووووووت البلوجر بتاعك
والبوست ده بجد اكتر من هاااايل
ومافيش فيه حاجه ماحستش فيها اني مبسوطه
بجد سلمي

بيسوو said...

سكينة
ربنا كبير قوي ياسكينة وهو الي بيخلينا نشوف الجمال لما الدنيا تقفل في وشنا..الحمد لله على كل حال
ليكي وحشة


حمامة
انتي اجمل ياحمامة...كلها حاجات بسيطة جدا الي بتفرح الانسان


facemoon
يااااه..3 تحفة مرة واحدة الموضوع كبير كبير:)

ياريت متكونش الاخيرة انا بحذرك اهو :):)


اسراء
ok

theriddle
الكلام ده كبير..كبير..والموضوع مش بيطلع مني بالسهولة ده نتاج خروج كتير ولعب كتير واستهلاك لا محدود من المصاصات والشيكولاتة
:)
شرفتني

bluestone
دي احلى حاجة اصلا

امرأة تقول الذي لايقال
انتي عارفة ايه الهايل بجد..انه فعلا مش كل شئ بيفوت في عمرنا بيجرح

تامر نبيل
محدش يقدر ينساها...واصلا مش عايزين ننساها

فاطمة
اي خدمة ياستي..ابقي تعالي كل يوم
هجاوب على التاج بس مش كله علشان النص الاولاني جاوبته قبل كدة..مفيناش من زعل بقى..ماشي

nanooo
انا مبسوطة انك مبسوطة :)
هو ده المطلوب

ihapoof said...

حلو أوى البوست ده

والصوره كمان

ربنا يفرحك بالحاجات اللى بتحبيها

Eman Eltaher said...

بجد مش قادرة أوصفلك قد إيه البوست شدنى و انا بقراه
مش معقول البوست ده بتلقائيته و بساطته الجميلة اوى

على فكرة انا كنت عايزة أعلق على الموضوع الأخير بس انتى مش حاطة امكانية التعليق و الرد
كنت عايزة أقولك حاجة واحدة

انه اللى زيك ف طيبتك و رقتك و رومانسيتك الجميلة مستحيل يعمل حاجات كتير غلط
و البنى آدم خطاء بطبعه
و ربنا قسم بالنفس اللوامة

لإنها أكتر نفس بتحس أوى بغلطها و بتكبر منه لانها نفسها تكون اجمل نفس طيبة و بتحلم دايما بالأفضل لروحها النقية المكنونة جواها

و انتى كده
متقلقيش انا برضه زيك بلوم نفسى كتير
بس أهم حاجة يكون عندنا إيمان

إنه برضه بكرة و اللى جاى أحسن كتير بإذن الله و مشيئته

بيسوو said...

وحشتيني قوي يا ايمان..افتقدتك فعلا الفترة الاخيرة دي

كلامك بيريح قوي يا ايمان بجد..بس انا زي كل الناس بغلط ونفسي ربنا يسامحني..وبندم جدا على حاجات عملتها ومش ممكن انها تتغير..ببقى عايزة من ربنا انه يشيل وجع الندم ده..الندم بيوجع قوي يا ايمي

متبقيش تغيبي كتير كدة تاني

يمامة شاردة said...

تعليقاً على البوست ده و على اللي بعده

ربنا يريح قلبك و يفرحه

انتي عملتي حصر لكل الحاجات الحلوة اللي في الدنيا

الحاجات اللي بتفرحنا كلنا

بوست بسيط .. لكن جميل

زي المدونة كلها

:) تحياتي

يمامة شاردة said...

نسيت أقولك إن ربنا جميل .. جميل أوي .. وماحدش هايحبك أده

افتكري ده كويس .. وخليه في بالك دايما
:)

momken said...

البلوج بتاعك جميل والبوست الى فوق ده مع نك قافله التعليق بس انتى بتقولى الى كلنا عاوزين نقوله ومكسوفين
مكسوفين ن نفسنا قدام ربنا
مكسوفينن منه اوى
هو الوحيد الى يقدر يطلعنا من كسوفنا منه علشان نعترف ونتوب من جاحه مش بيحبها

ربنا يحقق كل امنياتك يارب


تحياتى

بيسوو said...

يمامة شاردة
الحلو في السعادة انها واحدة عند كل الناس تقريبا..نفس الحاجات الي بتفرح هي نفسها الحاجات الي بتفرح ده

ربنا مفيش اجمل منه ولا احن منه ولا اكبر منه اصلا..دي حاجة انا متأكدة منها وعايشة عليها


ممكن
ربنا اكبر من كسوفنا ومن اخطائنا بكتير..فوق ما نتصور