Friday, April 11, 2008

أعرفك بنفسي

تاج عرفني بنفسك..هو اسمه كدة...وصلني من منى..قلت والله التاجات ليها وحشة واسئلة ظريفة ولطيفة وخفيفة وبنت حلال ليه مجاوبش..اجاوب وماله هو انا صغيرة


لو أعطيتك ثلاث وردات .. من هم الثلاث الأشخاص اللى هتعديهم الورد الي معاك؟
واحدة ليا علشان بحب الورد:)
واحدة للراجل الي بيصحلي الكمبيوتر لما بيضرب علشان بيتعب معايا
واحدة للناس الي نظموا الاضراب


لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
اول سطر...ان الله لايغير ما بقوم حتى يغيروا ما بأنفسهم..القران
تاني سطر...الوقوف على عتبات البهجة دائما أفضل من البهجة نفسها..عاجباني قوي الجملة دي..عتبات البهجة
ثالث سطر...انت الحقيقة في دنيا زيف..لأي معنى جميل في حياتنا


ما هو هدفك فى الحياة ؟؟
هدفي الاعظم اني اعمل حاجة بحبها مش تقضية واجب وخلاص...وافيد الناس الي حواليا علشان ميبقاش وجودي من عدمه واحد


إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟
بحاول اقنع نفسي بيها واصدقها حفاظا على الصحة العقلية مش اكتر


أجمل مقولة سمعتها / سمعتيها فى حياتك ؟؟
رباعية لجاهين
يأسك وصبرك بين اديك وانت حر
تيأس ما تيأس الحياة راح تمر
انا دقت مندا ومندا عجبي لقيت
الصبر مر وبرضك اليأس مر
مأثرة فيا جدا ولازقة في دماغي بقالها سنة ونص تقريبا او اكتر


من المغنى اللى بتحبه أوى و إيه أحلى أغنية ليه بتحبها ؟؟
منير\فيروز
كلهم..كلهم


غزة" تمثل لك إيه فى حياتك ؟؟
اهانة تضاف الى قائمة الاهانات في حق العرب
خلاص..جسمنا نحس


أعطى لإنتمائك لوطنك درجة من مائة ؟؟
اكدب لو قلت اقل من 100 من 100


لو تزوجت / تزوجتى و أنجبت بنتين و ولدين أى الأسماء تختار لهم ؟؟
حاسة ان السؤال ده عدى عليا قبل كدة...اه ده فعلا عدى..علشان بس الملل والخنقة انزل تحت شوية وانت تعرف موضوع الاطفال ده في اخر تاج


عمرك غشيت فى أمتحان و انت صغير ؟؟
لأ غشيت وانا كبيرة..وانا صغيرة كنت صاحبة مبادئ :)


لو أتعرض عليك رشوة كبيرة و انت فى زنقة ماليه هتعمل إيه ؟؟
سؤال غير منطقي بالنسبة ليا..لأني لا ماسكة منصب مهم ولا موقعي حساس في الدولة وغالبا انا الي هدي الرشوة للموظف علشان يمشيلي شغلي :(
علشان انا لسة من طبقات الشعب المطحونة الحمد لله


5 comments:

حاسوباتيه said...

ياحلولي ياحلولي اول تعليق
اجاباتك جميله خالص بالزات سؤال ال 3 وردات ده سؤال جميل قوي اصلا واجابتك اجمل لان احنا مهندسين الكمبيوتر بالزات بنتعب جامد والله مع الاجهزه فعلا نستاهل بوكيه ورد مش ورده واحده بس يلا مقبوله منك يا قمر وكل التاج حلو وانا كمان جايلي نفس التاج وهجاوب عليه قريب

بيسوو said...

انتو ياستي تستاهلوا جنينة بحالها مش بوكيه

ابو على said...

والبحر بيضحك ليه وانا نازله ادلع املى القلل .. ويقولو ليه فيه شح ف الميا ف م نصر اتارى بقى
كان نفسى يبقى فيه سؤال من الاخ الى عمل التاج دا
بالمناسبه اصلى لسه جديد ف التدوين يعنى ايه تاج:d بترمز لايه يعنى؟ ما علينا
المهم كان نفسى يسألوكى السؤال دا....لو حبيتى تهبى حياتك لشخص.. هايبقى مين؟؟ على فكره تهبى يعنى تمنحى:d
يلا بساعدك ف الاجابه اهو
كل سنه وانتى تاجك بيبرق

Mona El-Shourbagy said...

بيسوو
انتى بتخمى
فى سؤالين مجوبتيش عليهم
سؤال أسماء الأولاد
و سؤال هتمرر التاج لمين

إجاباتك جامدة جداااا يا بيسوو شكرا و مستنيه باقى الأسئلة لو سمحتى

momken said...

التاج مجميل ومختلف
فى تاجات كتير بتكون بتلف وتدور حولين نقطه واحده وبيكون الى عامل التاج عاوز يعرف شىء معين

لكن التاج بتاعك ده جميل اوى
والى بعهتهولك بيفهم اوى
كمان اجاباتك جميل وشيك اوى ورشيقه
ولو انك تلصقتى كام سؤال
وتجنبتى كام سؤال
بس جميل اوى

تحياتى