Monday, September 3, 2007

وادي رقصة المجنونة..يابا يابا عاليمونة

اه يامجنونة..كلمة اتقالتلي كتير..مؤخرا مبقتش ازعل منها لانها بقت بالنسبالي مدح مش ذم
تعالو نحسبها...ايه احلى من انك تبقى مجنون رسمي وتضرب الحياة والحاجات الي متعجبكش فيها بالقديمة...زمان كنت فاكرة ان العقل زينة وطول عمرها امي بتقولي كدة بس اكتشفت ان الجنون ازين من زينة العقل

طب سؤال ....فيها ايه يعني لو اتجننا ساعة او ساعتين كل يوم..مش هيجرى حاجة والنتايج بعد كدة هتبقى هايلة....مهو مفيش حد مهما بان قدام الناس انه عاقل ورزين معدتش عليه لحظة جنون خلته يعمل حاجة هبلة وعبيطة لمجرد انها خطرت على باله

الراجل العاقل الرزين ابو بدلة وكرافتة.....شكله عاقل وقمة العقل بس اكيد جت عليه فترة اتمنى فيها انه يلبس تي شيرت وشورت ويروح الشغل ...أكيد كان نفسه فس مرة من المرات انه يمسك راس المدير بتاعه ويخبطها في الحيطة

والبنوتة الي دايما نازلة من بيتهم متقمعة ومتلمعة ومتحفلطة ومتزفلطة ولابسة على سنجة عشرة ....محدش يقولي لن عمرها ما حلمت انها تنزل من بيتهم وهي من غير ماكياج بالبيجاما وشبشب زنوبة ....عمرها ما اتمنت انها تبطل زقزقة العصافير الي بتعملها لما بتتكلم مع اي حد وتتطلق لنفسها العنان وتجعر بصوتها الطبيعي

فاكرين فيلم اسماعيل ياسين الي نصه ابيض واسود ونصه بالالوان الي فيه الامير قمبيز والاميرة بهريز والسلطان بشاميل والسلطان كراميل...والله مش فاكرة اسمه ايه وممكن محدش يفتكره بس خلاصة الفيلم والعبرة منه ان العقل يكسب واصحاب العقول في راحة....صدقوني مش على طول....مهو اسماعيل ياسين برضو عمل فيلم اسمه المجانين في نعيم...طب نصدق انهي فيلم منهم بقى...حاجة تمخول والله

نصيحة اخوية
لما هنتجنن ساعتين كل يوم هنفك مسمار صغير في مخنا مما سيؤدي الى تخفيف الضغط القوي على المغفور له المخ واهو نتجنن ساعتين كل يوم بدل ماا نتجنن العمر كله..قضا اخف من قضا...

لازم نحسبها صح العمر مش بعزقة والواحد مش لاقي مخه على الرصيف

14 comments:

The Alien said...

الجنون حرية
والواحد فعلا نفسه يتجنن
بس مش ساعتين بس

تحياتي

simply me said...

وانا كمان اوافق على فكره الجنون المؤقت دى

حلوه اوى وتخلى الواحد يطلع اللى جواه بدل ما يفرقع

kafrawy said...

هى ناقصة جنان



الطف بينا يا رب

سكينة said...

بتنزل متصفلطة
:)))
عجبتني جدا ومعبرة فعلا عن حالة ناس كثيرة ماشية يا بامية يا مقمعة
وفي انتظار المزيد من تفاصيل الجنون المسموح به يعني الكتالوج بلاش نعك الدنيا وبعدين يطلع جنان مرفوض
من غير هزار وبجد نحتاج فعلا مش لساعتين فقط ولكن على طول أن نتخلص من بعض النشا اللي مغرق حياتنا وعلى ولا حاجة أخرتها مش هناخد غير نصيبنا

bastokka طهقانة said...

سامعة


اسمعي كويس
قربي كمان


مش سامع حاجة

ماهو ده اللي مجنني
:)
اوروفوار

همسات ساكنه said...

الجنان شيئ جميل
لو الانسان فضل عاقل
اكيد حيتجنن في يوم
مفيش حد منفسوش يعمل حاجه
واللي نفسه يعمل حاجه ومعملهاش حتطلع له في احلامه
يبقى لزومها ايه الكوابيس
طب خلينا نعيش مجانين بقى

ياسر مدني ...دينامو الإخوان said...

لصاحب المدونه وكل زواره
أدعوكم لإبداء الرأي والمشاركه في فوازير رمضان الإسلاميه بعنوان خلق وصحابي

ياسر مدني ...دينامو الإخوان said...

لصاحب المدونه وكل زواره
أدعوكم لإبداء الرأي والمشاركه في فوازير رمضان الإسلاميه بعنوان خلق وصحابي

أنا حر said...

احلى حاجة في الدنيا الجنان بس حتى في الجنان لازم نكون عاقلين علشان ما يتحولش الجنان لأخطاء ندفع احنا ثمنها
موضوع جميل قوي
تحياتي

ALiaa said...

الجنون... لحظة توافق مع العالم المجنون

أنيس منصور

خليكي كدة
:)

Eman Eltaher said...

انتى دمك خفيف موت يا بيسوو
ايه يا عم العسل ده ؟؟
فعلا مفيش أحلى من الجنون
مكش شايلين هم ف الدنيا و مش داريين بيها أصلال

بس برضه الحمد لله على نعمة العقل عشان ربنا بيحبنا انه اداهولنا و يديمه علينا برضه عشان ندوق الحياة بحلوها و مرها

انتى عسولة اوى و الواحد نفسه فعلا يتجننله يومين

ههههههههه

يارب أشوفك منورة مدونتى كالعادة

الأستاذ said...

أنا عرف الفيلم ده تقريباً "العقل والمال" حاجة كدة
بس عندك حق مهما كان الواحد في قمة عقله بيوصل إلى درجة من الجنون
لأن العباقرة في حد ذاتهم أقوالهم وأفعالهم التي تبدو عاقلة لمن هم أقل منهم علماً وعقلاً في وقتها هي في حد ذاتها منتهى العقل بعد فترة

أنا إيه الكلام اللي بقوله ده أنا باين عليا اتجننت تقريباً

زي جاليلو لما قالو عيه مجنون إنه قال إن الكرة الأرضية هي اللي بتلق حول الشمس مش العكس قالوا عليه مجنون بعد كدة إتضح إنه عبقري لأن كلامه طلع صح ومنطقي
يلا رمضان كريم وشكراً

basma saghir said...

the alien
فعلا

بندقة
ده برضو رايي

kafrawy
ربنا دايما موجود

سكينة
اخر مرة سمعتها كانت يابلحة يا مقمعة معرفش امتى بقت بامية..ماعلينا احنا دايما كدة نسيب الموضوع الاساسي ونمسك في سفاسف الامور
عيشي حياتك بقى وانسي

طهقانة
اوروفوار عليكي ورحمة الله

همسات ساكنة
عموما مفيش حاجة حلوة على طول..ممكن يجي وقت ونزهق من الجنان ونحتاج لشوية عقل..واكيد هنزهق من العقل وهنتجنن تاني..هي الحياة كدة والانسان بطبعه ملول

ياسر مدني
على وعد

انا حر
الجنان بعقل...حلوة الفكرة دي اني اكون مجنونة بس مش مجنونة قوي..فعلا ممكن اكون مجنونة في حاجات وعاقلة جدا في حاجات تانية

علياء
انا اصلا كدة :)


ايمي
العقل زينة على حسب ما بسمع...بس يعني ايه الضرر من شوية فلاتان منه

الاستاذ
ايه ده...؟ انت قصدك ان انا عبقرية علشان بنادي بالجنون..متحطش امل على كدة ممكن اطلع مجرد مجنونة لا اكتر ولا اقل
الله اكرم

eori said...

الفيلم اسمه العقل والمال يا بسمه وده من اكتر الافلام اللى بحبها ل اسماعيل ياسين لانه بجد مليان ضحك من امبراطور الضحك