Sunday, October 7, 2007

في النهاية


اخر حاجة شافتها كانت ارقام العربية..واخر حاجة سمعتها اصوات عالية وتوحيد لله..يظهر ان الي حصل مش سهل ابدا


راندة كانت خارجة مع امها زي كل يوم...عادي يعني..اصل الفرح قرب ومامتها عايزة تجيبلها الدنيا كلها لو كانت تقدر..اصل راندة كانت بنت وحيدة على اربع اولاد...كانت بونبوناية البيت...بشكل ما راندة كانت حاسة انها مسؤولة مسؤولية كاملة عن اهل البيت من اكل وشرب وغسيل هدوم وتنظيف وده لان والدتها كانت في شغلها دايما وتقريبا هي الوحيدة الي مش بتشتغل


بصراحة كانت تتحب من اول نظرة..ملامحها هادية ومكتوب على وشها الطيبة وعنيها الواسعة دي وكأنها شبابيك بتطل على روحها الجميلة


راندة كانت عادية زينا كدة...بنت وزي كل البنات وبتحضر لفرحها..مستنية حياة جديدة..وانسان جديد هتعيش معاه..وعلى قد ما الخوف كان موجود على قد ما السعادة كانت برضو موجودة

اصحاب راندة كانوا عبارة عن كل الشارع الي هي عايشة فيها والشارع الي وراهم كمان علشان كدة الفراق كان صعب عليها وعليهم


تسمعوا طبعا عن الحب الي من غير حدود..حب الام لبنتها..ده كان موجود واكتر منه مليون مرة بين راندة وامها حب كدة خليط بين حب الام وحب الصديقة ومعاهم تعود واحتياج...مش مهم مين محتاج لمين لان هما الاتنين محتاجين لبعض


بعد ما العربية جريت-كالعادة يعني- الناس راحت على المستشفى علشان يحاولوا ينقذوا مايمكن انقاذه...العمليات اتفتحت والطوارئ اشتغلت...والامل رجع يعيش من تاني...وكل ما الفترة تطول الامل يكبر ويكبر لغاية ما ادينا الامان بس للاسف الامل مات بعد3 ايام....وراندة كمان ماتت

كلمة بسيطة بتوصل خبر مدمر...لأ مش مدمر هو مميت

سمعت الخبر يوم 3 رمضان الساعة 8 الصبح...راندة ماتت....ماتت في حادثة عربية..بس مش اي عربية ..دي عربية جيب شيروكي من ام 250 الف ...معرفش كان شارب ايه بالضبط بس الي حصل حصل مهما كان الي شاربه اهو ادى مفعوله وخلاص بس بدل ما يقتله هو-ودي امنيتنا كلنا- قتلها هي ...وهي ملهاش ذنب

ملهاش ذنب في انه حب يسوق وهو مش في وعيه وملهاش ذنب في انه ابن ناس ليهم ظهر...وده طبعا يخلي اهلها ظهرهم مكسور


العزا كان في الشارع لان الشقة البسيطة مساعتش الناس ويمكن كمان مساعتش الحزن..مش متعودة عليه...محدش مصدق ومحدش عارف ايه الي بيحصل...هو مش المفروض انها عروسة وفرحها الشهر الجاي...طب ايه؟


جدتها ست كبيرة مقدرتش غير انها تعدد على حفيدتها وسمتها عروسة المقابر...صح...راندة كانت عروسة بس خلاص بقى كله يهون في سبيل الجيب ام 250 الف


الي طبعا هتخرج من القضية هي والي سايقها علشان قدر يثبت انه مش هو الي كان سايقها بطريقة ما


من الاخر

في النهاية راندة ماتت وساببت فراغ في قلب امها وابوها وخطيبها...لأ هو مش فراغ...دي حفرة سودا مليان الم وندم...كلامي المتواضع مش هيقدر يعبر عنه ولايوصفه ولا يوصله للعقول


في النهاية ماتت علشان احنا في مصر..في النهاية ماتت علشان في كوسة ومهلبية...في النهاية ماتت علشان في ناس ليهم ظهر وناس ظهرهم مكسور بعيد عنكم

7 comments:

عـلا - من غـزة said...


لا حول ولا قوة الا بالله :(

انا آسفة جدا

حاسة بمقدار حزنك من بين الكلمات .. بالرغم من عدم ذكر علاقتك بيها ... لكن طريقتك في الكلام عنها حزنتني فعلا ... العزاء الوحيد الي اقدر اقوله انها ماتت في رمضان .. غدرا ... شهيدة !!

ونحسبها عند الله كذلك !!

تحياتي

bos bos said...

كلماتك وجعتنى قوى قوى
البقاء لله والدوام لله ربنا يرحمها ويغفر لها ذنوبها ويدخلها فسيح جناته
ويصبرك ويصبر أهلها يارب

zordeak said...

البقاء لله

لا حول ولا قوة الا بالله

اللهم ارحمها واغفر لها واسكنها فسيح جناتك


كلامك بيوجع اوى

فكرتينى بنفس الموقف اللى حصل لواحدةكانت زميلتى فى يوم من الايام

وكانت رايحة تشترى حاجات الفرح هيا ومامتها

وعملت حادثة


هيا ومامتها

والاتنين دلوقتى عند ربنا

البقاء لله

:(

Dr Emad said...

البقاء لله
كلامك مؤثر جدا جدا
يمكن يكون هو ده فعلا السبب الحقيقى الفوضى والاهمال والكوسه
بس فى النهايه ربنا يرحمها
وزى م zordeak قال كان فى فعلا واحده زميلتنا جميله وكتكوته وعروسه
ماتت هى ومامتها قبل فرحها باسبوع
فى حادثه برضه
شىء صعب جدا جدا
ربنا يسلم

bos bos said...

ليكى تاج عندى روحى خديه

فدا said...

السلام عليكم

!!!!!!!!!!!
!!!!!!!!!!!
ربنا يرحمها يااا رب
ربنا يرحمها :'(
مش عارفة اقول والله
ربنا يصبر اهلها يا رب
ربنا بيحبها فعايزها عندو
ربنا ارحم بيها
و بيحبها اكتر من الناس اللي حبوها يا حبيبتي
:)

فدا

Anonymous said...

6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲

言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO

情趣用品,情色,成人,A片,自拍

情趣用品,色情,成人影片,色情影片,免費A片

情趣用品,成人網站,A片下載,日本AV,做愛

情趣用品,美女交友,A片,辣妹視訊,情色視訊

情趣用品,色情聊天室,聊天室,AV,成人電影