في النهاية

اخر حاجة شافتها كانت ارقام العربية..واخر حاجة سمعتها اصوات عالية وتوحيد لله..يظهر ان الي حصل مش سهل ابدا

راندة كانت خارجة مع امها زي كل يوم...عادي يعني..اصل الفرح قرب ومامتها عايزة تجيبلها الدنيا كلها لو كانت تقدر..اصل راندة كانت بنت وحيدة على اربع اولاد...كانت بونبوناية البيت...بشكل ما راندة كانت حاسة انها مسؤولة مسؤولية كاملة عن اهل البيت من اكل وشرب وغسيل هدوم وتنظيف وده لان والدتها كانت في شغلها دايما وتقريبا هي الوحيدة الي مش بتشتغل

بصراحة كانت تتحب من اول نظرة..ملامحها هادية ومكتوب على وشها الطيبة وعنيها الواسعة دي وكأنها شبابيك بتطل على روحها الجميلة

راندة كانت عادية زينا كدة...بنت وزي كل البنات وبتحضر لفرحها..مستنية حياة جديدة..وانسان جديد هتعيش معاه..وعلى قد ما الخوف كان موجود على قد ما السعادة كانت برضو موجودة

اصحاب راندة كانوا عبارة عن كل الشارع الي هي عايشة فيها والشارع الي وراهم كمان علشان كدة الفراق كان صعب عليها وعليهم

تسمعوا طبعا عن الحب الي من غير حدود..حب الام لبنتها..ده كان موجود واكتر منه مليون مرة بين راندة وامها حب كدة خليط بين حب الام وحب الصديقة ومعاهم تعود واحتياج...مش مهم مين محتاج لمين لان هما الاتنين محتاجين لبعض

بعد ما العربية جريت-كالعادة يعني- الناس راحت على المستشفى علشان يحاولوا ينقذوا مايمكن انقاذه...العمليات اتفتحت والطوارئ اشتغلت...والامل رجع يعيش من تاني...وكل ما الفترة تطول الامل يكبر ويكبر لغاية ما ادينا الامان بس للاسف الامل مات بعد3 ايام....وراندة كمان ماتت

كلمة بسيطة بتوصل خبر مدمر...لأ مش مدمر هو مميت

سمعت الخبر يوم 3 رمضان الساعة 8 الصبح...راندة ماتت....ماتت في حادثة عربية..بس مش اي عربية ..دي عربية جيب شيروكي من ام 250 الف ...معرفش كان شارب ايه بالضبط بس الي حصل حصل مهما كان الي شاربه اهو ادى مفعوله وخلاص بس بدل ما يقتله هو-ودي امنيتنا كلنا- قتلها هي ...وهي ملهاش ذنب

ملهاش ذنب في انه حب يسوق وهو مش في وعيه وملهاش ذنب في انه ابن ناس ليهم ظهر...وده طبعا يخلي اهلها ظهرهم مكسور

العزا كان في الشارع لان الشقة البسيطة مساعتش الناس ويمكن كمان مساعتش الحزن..مش متعودة عليه...محدش مصدق ومحدش عارف ايه الي بيحصل...هو مش المفروض انها عروسة وفرحها الشهر الجاي...طب ايه؟

جدتها ست كبيرة مقدرتش غير انها تعدد على حفيدتها وسمتها عروسة المقابر...صح...راندة كانت عروسة بس خلاص بقى كله يهون في سبيل الجيب ام 250 الف

الي طبعا هتخرج من القضية هي والي سايقها علشان قدر يثبت انه مش هو الي كان سايقها بطريقة ما

من الاخر

في النهاية راندة ماتت وساببت فراغ في قلب امها وابوها وخطيبها...لأ هو مش فراغ...دي حفرة سودا مليان الم وندم...كلامي المتواضع مش هيقدر يعبر عنه ولايوصفه ولا يوصله للعقول

في النهاية ماتت علشان احنا في مصر..في النهاية ماتت علشان في كوسة ومهلبية...في النهاية ماتت علشان في ناس ليهم ظهر وناس ظهرهم مكسور بعيد عنكم