Wednesday, August 8, 2007

الوسادة المليئة


اعشق فيلم عبد الحليم "الوسادة الخالية" فكرة ذلك الحب الجديد السعيد الذي ولد بعد موت الحب القديم الحزين...وبالرغم من عودة شبح ذلك الحب القديم ليطفو على سطح الحياة فان الحب الجديد وان كان ضعيفا وهشا بعض الشئ استطاع ان يصمد في وجه اعاصير الماضي ببساطة لانه صادق وحقيقي


فكرة ان تستغني عن وسادة خالية لتستبدلها بوسادة مليئة بحب حقيقي هي فكرة محببة للنفس...خاصة في ايام صعبة كأيامنا هذه....


شاهدت الفيلم من فترة ليست بالطويلة....ولا اعرف لماذا ذكرني هذه المرة بوسادتي العزيزة وكم تحملت مني وشاركتني في جميع لحظات حياتي تعيسها قبل سعيدها....الاحتمال الاكبر ان الحمل اصبح ثقيلا عليها تلك المسكينة..تلك المشاعر من الصعب ان يتحملها انسان واحد ولكنها تتحملها بكل شجاعة...وفوق ذلك هي كاتمة جيدة للاسرار...وكاتمة للصوت في كثير من الاحيان


لا اعتبر وسادتي خالية جدا...في الحقيقة هي خالية نوعا ما...فلا ارى فيها صورة شخص ما وهو يبتسم ويعدني بأيام رائعة قادمة...


وسادتي


وسادتي..مليئة بأشياء اخرى...مليئة بمختلف انواع المشاعر..

عليها اثار دموع خلفتها تلك اللحظات الكريهة التي نبكي فيها...ولو الصقت اذنك عليها جيدا من الوارد ان تسمع صوت ضحكاتي العالية...اغتاظ من شئ ما او من شخص ما فتمتلئ وسادتي باثار العض ولا مانع من بعض الصراخ ايضا


على وسادتي..افراحي واحزاني...مخاوفي وطموحاتي..عليها احباطاتي وكابتي...وسادتي تحتضن امالي وافكاري...تحتضن احلامي وكوابيسي...تحتضن حبي وكرهي


وسادتي هي صديقتي في الليالي المظلمة التي يغيب فيها القمر واصبح فجأة وحيدة بلا قمر وبلا ضوء....وسادتي هي من احتضنها فتلمئ ذلك الفراغ بجانب قلبي...


وسادتي لاتكون ابدا خالية...هي مليئة دوما

12 comments:

Eman Eltaher said...

يااااااااااااااه يا بيسوووو
عايزة أقولك انك رومانسية موت
كل تعبيراتك و كل كلامك

فعلا فيلم الوسادة الخالية جميل اوى
و انا بحب اتفرج عليه لعشرات المرات

عايزة أقولك كلمة ف ودنك
كل اللى قلتيه ده بيعانى منه كل الناس

بس الحمد لله على كل شئ طبعا
و كويس انه فيه مخدة عشان نشكيلها و نبكى عليها
فيه ناس مش لاقيين حتى مكان يناموا عليه
فالحمد لله على كل شئ
و عايزة اقولك برضه

و زى ما هقولك الكلام ده بقوله كتير لنفسى

امتى الانسان بيحس بطعم السعادة لما تجيله ؟؟
لما يدوق طعم الحزن و يحس بمرارة الانكسار قبل كل شئ فبتبقى السعادة بالنسباله لها طعم تانى بسبب المعاناة و طولة الانتظار

اما امتى هتيجى ؟؟
فده كله ف علم الغيب
مش عايزة اشوفك تكتبى حاجة حزينة تانى
انا يمكن اكون احزن منك بكتير بس بحمد ربنا انى بقدر احب الحياة حتى بكل تعبها و قرفها
حبى الحياة يا بيسوو هتلاقى الدنيا بقت حاجة تانية
و اضحك الصورة تطلع حلوة
ها ضحكتى و لا لسه ؟؟

طب اقول نكتة ممكن ؟؟
طبعا ممكن :)
و لا اقولك بلاش ابقى بايخة احسن و النكتة تكون رزلة
عموما انا حاطة نكت قد كده ف المدونة عشان كل ما اتنكد الاقى مصدر يضحكنى
بس ساعات النكت بضحك عليها من هبلها
:)

على فكرة البوست اللى فات ف غاية الروعة و يا خسارة انى بقرا المواضيع متأخر
اشوفك على خير ان شاء الله

تحياتى ليكى

محمد said...

على فكره الوساده مش صحيه
جربى تنامى من غير وساده
:-)
على فكره كلماتك جميله جدا

bos bos said...

تعبيراتك وكلماتك رائعة الموضوع كله رائع فكرتينى بوسادتى اللى شالت منى كتير ولسة بتشيل
تحياتى لكى

أنا حر said...

بوست رائع بجد احساس مختلف برغم وجود بعض الالم فيه الا انه موجود حنان وامان فيه قصة الارتباط العاطفي بالاشياء المادية اللي حوالينا فكرة جامدة محتاجه قبل كبير زي قلبك يحسسنا بيها فعلا
تحياتي

مشمشه said...

البوست جميل جدا والكلمات بتاعتك لمستنى من جوه عارفه لما تيجى على الجرح مش معنى كده ان عندى وساده خاليه ولا حاجه بس حسيت معاكى انك برده بتعملى زيى لما بتيجى تحكى بتحكى لحاجه تتحمل عشان مش بقى فى حد يتحمل عبء الحياه عن الناس الا...........

بيسوو said...

ايمي
ميرسي بالكوم والله يا ايمي دايما كدة بتجبري بخاطري..فعلا المخدة دي اهم حاجةاخر اليوم لانها هي الي بتريحك جسديا ونفسيا..معاكي حق في اننا عمرنا ماهنحس بطعم السعادة غير لما ندوق شوية حزن..بتفرحيني دايما يا ايمي بكلامك

محمد
مش مهم مهي الصحة كلها خربانة مجتش على المخدة يعني..تشكرات

بوس بوس
زي ما قلت المخدة ثم المخدة شكرا ليكي انتي اروع

انا حر
مبعرفش فعلا ارد على المجاملات الكبيرة دي غير بالشكر..بس الحاجات المادية هي الي بتساعدنا نكمل..ولا ايه؟؟

حلوياااااات
يا اكبر معجبة بيا...انتي عرافاني مبحبش ازهق حد ومبحبش ارخم على حد بحب دايما اكون خفيفة على اساس خف تعوم مع اني غرقانة زي ما انتي عارفة..شرفتيني..ولازم تشوفي الفستان

nadine said...

بيسووووووووو

وحشانى قوى قوى قوى
عاملة ايه يا سكر؟؟؟
و ايه اخبار الأدازة معاكى؟
رحتى إسكندرية و مطروح ولا لسه؟
يوووه
انا رغاية قوى
ندخل فى موضوع البوست بقى
يا شيخة شكل مخدتى و مخدتك ولاد عم ولا ايه

لأ بجد
مرة تانية بحس ان الكلام اللى بتكتبيه ده جوايا

احييكى بشدة و انحنى احتراما لكى و لكلامك البسيط السلس و المعبر فعلا

وحشانى بجد قوى خالص
مووووووووووااه
باى

أخف دم said...

ازيك يا بيسو
بقى كل دول على المخدة بتاعتك؟؟ ليه ؟؟ انتى سريرك كام سنتى؟؟؟ والمخدة قد إيه..
ربنا يحققلك كل اللى بتتمنيه يا بيسو .. بس برضه انت محتاجة شوية جهد وسعى .. متفضليش كده مرتاحة وتحضرى أفراح بس
ربنا يكتر أفراحك يارب

نفسنا said...

موضوعك رائع جدا وتعبيراتك وأسلوبك جميل

بيسوو said...

نادين
الاجازة خلصت خلاص يانادو عااااااا اضتايقت لما صحيت الصبح لقينت نفسي في شهر اغسطس والمحلات منزلة لبس المدارس والشنط وحاجة تغم بعيد عنك وعن السامعين...بخصوص اسكندرية ومطروح ممكن انسى الموضوع ده خلاص مفيش امل....وبما ان مخدتي ومخدتك ولاد عم تعالي نحط نحط مخدتك على مخدتي ونشوف هيحصل ايه
وحشاني يانادو والله


اخف دم
اشرف...اخيرا..اه كل دول على المخدة شفت شايلة قد ايه ابقى فكرني اجيبلك واحدة من عندي هدية
هحاول اسعى وابذل جهد زيادة شوية بيني وبينك القعدة دي ممنهاش فايدة وحضور الافراح متعب جدا وفي الاخر العروسة للعريس واحنا الي بنتسوح

نفسنا
تشكرات

Eman Eltaher said...

حبيبتى يا بيسووو
عايزاكى تكتبى حاجة جديدة و تكون سعيدة يا جميل
انا مستنية ان شاء الله
هدخل الاسبوع الجاى لانى للأسف مش بدخل النت غير كل اسبوع
تنقل بين الأم و الأب و كده
المهم
عايزة لما أدخل أبقى ألقى موضوع جديد كله سعادة
و أمل

وحشانى و الله
و نفسى أتعرف عليكى أكتر

تحياتى يا بيسوو

جوستيـن said...

ايه موضوع الاشياء الاخري دي ؟؟
المدونات كلها بقت فيها اشياء اخري

حكاوي وتخاريف واشياء اخري
تطلع ايه بقي؟