Wednesday, July 11, 2007

انه لتاج اخر..اي نعم تاج

صدق او لا تصدق بقيت بحب موضوع التاجات ده مع اني في الاول كنت بكرهه عمى سبحان مغير الاحوال..الحكاية باختصار ان في 2 تاج وصلوني.,واحد من احمد فؤاد والتاني من مبرمج حر..ونداء لكل مدون ومدونة اي حد مزنوق في تاج متشيلش هم..دووووووس وميهمكش

التاج الاولاني ده عبارة عن اختبار لللادمان..لا بالطبع مش ادمان هيروين ولا حشيش ولا حتى شيكولاتة وشيبسي..ادمان تدويييين ان ان ااااااااااااان تششششششششششش انا اتضح اني مدمنة تدوين بنسبة 81% وزي ما انتو شايفين دي نسبة مش بسيطة ابدا دي تدخلني تجارة بالمستريح..لا بجد اتضح اني مدمنة جدا جدا جدا على التدوين ده

81%How Addicted to Blogging Are You?

Mingle2 - Online Dating



وده كان تاج الادمان

التاج التاني ده من السيد احمد بتاع كلية الطب بيقووووول:

احب شخص لقلبك في الدنيا؟
اكيد هو مش شخص..هو ربنا سبحانه وتعالى..ومن بعده الرسول وامي وابويا دي حاجة مفروغ منها طبعا


انسان مستعد تضحي بحياتك – ركز فى كلمة حياتك - عشانه؟

امي وابويا واختي

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك ؟

ياساتر ياساتر..هو في حد كدة..بس الصراحة انا اتمنيت يحصل لحد في موقف معين..الي هو ايه..كنت نازلة من البيت ومستعجلة علشان العائلة الكريمة مستنياني في العربية وطبعا مفيش حد في البيت ومن الصربعة نسيت المفتاح جوة وطلعت من الشقة وقفلت الباب ورايا بكل ثقة..ساعتها اتمنيت ان الباب يتكسر مية الف حتة وسكاكين بقى وسواطير وهيصة....بس اتمنيت كدة لبني ادم معتقدش انا كبيري لما اكرهه حد ادعي عليه انه يتجنن ويمشي في الشوراع وشعره منكوش والعيال يحدفوه بالطوب....بس

اسم أجمل كتاب كتبه بشر قرأته ومحتفظ به حتى الان؟انت متعلق بيه وبتقرأه كل فترة؟

انا كارنينا..ليو تولستوي

لعلك تضحك..انيس منصور

ماوراء الطبيعة..كل السلسلة..احمد خالد توفيق

اهم جهاز منزلى انت متعلق بيه او بتستخدمه كتير؟

الكمبيوتر والمايكروويف

شىء تحس بالراحة النفسية عندما تنظر اليه؟

ماما...احيانا...ودايما القاهرة بعد الساعة 1 الفجر

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

مدرستي القديمة..وبيت جدتي الله يرحمها

اجمل مدينة زرتها داخل مصر؟

سؤال غريب..سؤال عجيب...اسكندرية اكيد

أجمل مكان طبيعي رأيته داخل مصر؟

شاطئ الابيض..في مرسى مطروح

شخصية كارتونية بتحبها؟

دونالد دك...بيصعب عليا وبحبه

نوع هاتفك المحمول؟

نوكيا مش فاكرة كام بس بكاميرا...لزوم الفشخرة

سرعة بروسيسور جهازك؟

مبحبش اقول علشان العين

حجم ذاكرة –هارد- جهازك؟

80 gega byte

المساحة التى تشغلها المواد الاسلامية على جهازك؟

معرفش بس كتير على ما اعتقد

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

نفسي تكون اكتر واكتر

أهم هدف انت واضعه لحياتك دلوئتى؟

اني اشتغل حاجة انا بحبها ولو هشحت واقول حسنة قليلة,,طبعا بغض النظر عن مجال الدراسة

مواصفات فتاة الأحلام بالنسبة لك ؟

هع هع هع...انا

صف ما يأتى

شعورك لما بتسمع كلمة مصر ؟

زمان لما كنت بعيدة عنها كانت بتوحشني وبحس انها جنة الله على الارض..بس حاليا بحس انها اختبار من الله لقوة ايماننا وصبرنا...وبفتكر ان المؤمن دايما مصاب

شعورك لما بتسمع كلام عن اليهود؟

كرشة نفس

شعورك لما بتشوف ظابط شرطة؟

عادي جدن...هو انا عاملة عملة..بس غالبا بحس انهم شايفين نفسهم فوق البشر..

لون البطانية اللى بتتغطى بيها فى الشتاء؟

ابيض في اخضر في اصفر...بس دي مش بطانية..ده لحاف

لون الجورب-الشراب- المفضل لديك؟

اي حاجة..المهم انه ميكونش مخروم :)

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

بحس اني..بحس اني..بحس اني...يعععععععععع....ايه القرف ده هو الواحد ناقص

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

الايمان في القلب..ساعات بحس مع بعض الناس انه ادعاء..وشوفوني انا متدين وملتزم واحيانا بحس انه طريقة اللبس نابعة فعلا من ايمانه.بس ارجع واقول ان الايمان في القلب ومش شرط علشان انت لابس كدة تبقى ملتزم..والله اعلم بالقلوب والنوايا

احساس يراودك فى اشارة مرور مغلقة بسبب مسئول كبير؟

مبحبش الانتظار ولو كان مين...وان البلد دي ماشية ببركة دعاء الوالدين فقط لاغير

تاج اخر

مين اكتر ست اشخاص بتحبهم ؟؟؟

مقدرش احصرهم في ستة بس انا قلبي كبير يساع من الحبايب الف

هل أنت سعيد ؟

نوعا ما الحمد لله على كل حال

لو اجتمعت مع حسنى مبارك فى مكان واحد هتعمل ايه ؟

يامهشتكنا يا مبشتكنا ياريس..ده انت رئيس والنعمة كويس

هقوله اتقي الله فينا..علشان احنا تعبنا

لو معايا مليون ونص أعمل ايه ؟

مبعرفش اتصرف في الفلوس..هديهم لأمي وهي تتصرف

بتحب مصر ؟

ابسلوتلي

أنت مسلم ؟

لله الحمد

ليه ؟

علشان انا مسلمة اب عن جد واتولدت لقيت نفسي مسلمة...وعلشان مينفعش اكون اي حاجة تانية غير مسلمة..اول ما اتولدت كنت مسلمة على دين اهلي دوقتي انا مسلمة عن اقتناع تام وكامل

مين أكتر شخصية متقدرش تستغنى عنها ؟

محبش استغنى عن اي شخصية في حياتي كلهم مهمين جدا حتى عم صابر البواب..ده اهم واحد في العمارة

ايه أكتر موقف محرج ؟

لما اشاور للسي تي ايه في الشارع بكل ثقة وميرضاش يوقفلي....ولما اركب اي اتوبيس واقعد وادفع الفلوس وبعدين اكتشف انه مش رايح المكان الي عايزة اروحه

الأمنية اللى اتمنى تحقيقها ؟

اشتغل شغلة بحبها

التاج بقى يتمرر لمين ؟

تم بحمد الله

كان نفسي التاج ده تبقى نهايته على ايدي لان الناس كلها كرهوا التاجات ومبقاش حد يجاوب على حاجة بس انا برضو هتنح وهرخم وهبعته للناس

هبة لو سامعاني جاوبي عليه

ايمي..انا عارفاكي بتموتي فيهم

عمرو..انا عارفة انك مش هتعمل حاجة

بوس بوس..الروح

مش عارفة مين تاني والله..كله مكبر

كانت معكم بيسو من قدام جهازي..حااااااااااااااااا

10 comments:

أحمد said...

:))
أول مرة الاقى حد بيحب التاجز أوى كدة يا بيسوو ,

zordeak said...

ثانكس على سرعة الاجابة

اجاباتك لذيذة

بس فين مواصفات فتى الاحلام

بتهرجى

جرررررررررر


بس ضحكت على فكرة

هع هع هع

دمك خفيف يا مضروبة

:D

عقبال التاجات الجاية ان شاء الله

Eman Eltaher said...

حبيبتى بيسووووووووو
أنا غيبت كتيييييييير بس ربنا يعلم انه غصب عنى
على فكرة أنا بقيت مابدخلش غير خميس و جمعة و أحيانا لما الحظ ييجى على هوايا و ادخل ف يوم ف نص الاسبوع
يارب ماتكونى زعلتى منى

على فكرة انا قريت الموضوع اللى قبله ... بجد تحفة ما شاء الله عليك انتى موهوبة حقيقى
عارفة
الأجمل فيه أحاسيسك المرهفة و رومانسيتك

أما بقى التاجات فبتخلينى أضحك جدا لانك بتجاوبيها بمنتهى خفة الدم
ربنا يحميكى

و الى الأمام دايما
تحياتى ليكى

simply me said...

لالالالا كده ماينفعش
المدونات هاتججنا مش بس ادمان

خايفه من العين يا شريره انا اصلا ماعرفش سرعه البروسيسور دى بيجيبوها منين
ابقى قوليلى عشان ماقولش لحد

حلو اوى الشراب اللى ما يكونش مخروم ده
ههههههههههههههههههههههه

اسكتى على المواقف المحرجه :(

امبارح وقفنا احنا الاربعه عشان نوقف تاكسى ..... ولا تاكسى راضى يعبرنا
كان فاضل نوقف قدامه وبرضه كان هايمشى
موقف محرج اوى قولتلهم انتو منحسين

بس مدونه لذيذه ورغم انها اول زياره ليا
بس انشاء الله متابعه معاك

شجره الدر said...

ايه يابنتى الصراحه دى
حلوه حكايه الباب اللى كنتى ناويه تخليه25458حته
خلى بالك بعد كده وعلقى المفتاح فى سلسه فى رقبتك ياماما دى طريقه فعاله جدا

سكينة said...

تشابه غريب في نوعية الشرابات المفضلة لدينا
:)
أنا برضو أصر دائما ميكونش مخروم وحتى لما كانت موضة الشرابات المخرمة ملبستهاش عندي عقدةبحس أنهم بيستكردونا ويوفروا في الخيط وقال إيه قال موضة بس على مين الكلام ده مش عليا يا بابا
اما حكاية التاكس اللي مش بيوقف النهارد حسيت بيها لما كسلنا أنا وصاحبتي نسوق وسيبنا عربياتنا وخدنا تاكس لمشوار وعشان نروح وقفنا في عز الشمس وطول ما احنا واقفين وهي تبستف في أهلي أكيد باين علينا العبط محدش راضي ياخدنا معاه
:)

basma saghir said...

مبرمج حر
هي دي انا..مليئة بالمفاجات

زوردياك
لا ثانكس على واجب يافندم...فتي احلام ايه بس وبتاع ايع انت الي بتهرج والله..معنديش انا الحاجات العجيبة دي

ايمي
لا يا ايمي مقدرش ازعل منك ابدا..بس حاولي بقى تدخلي اكتر من كدة

بندقة
بيني وبينك..لما تعرفي انتي كمان ابقي قوليلي علشان اتأكد بس
اما عن المواقف المحرجة..العدد في الليمون...ده غير اننا خلاص بقينا تحت رحمة التكاسي ومزاجهم
اتشرف طبعا انك تتابعيني

شجرة الدر
شفتي بقى الصراحة..متلاقيهاش عند اي حد غيري...
استخدمت ماديلية خلاص المشكلة اتحلت

سكينة
اول مرة اعرف انه كان في موضة شرابات مخرومة تصدقي..جديدة دي
هو في حد يكون معاه عربية وياخد تاكسي..اكيد السواقين عرفوا كدة ومرضيوش يركبوكم
ربنا يجازيهم بقى

simply me said...

السلام عليكم.......عندى موضوع مهم لازم تشاركونى فيه ضرورى

بسمه عبدالباسط said...

على فكرة انا ما قريتش الأجابات بس كنت معدية عليكى لاقيت تاج بنزل لتحت لاقيتك ممرة التاج ليا أتخضيت بصراحة
بس ان شاء الله هجاوب بس ادينى فرصة اوك وكمان التاج الثانى ده جالى قبل كده بس كويس انك جبتيه تانى لان مدونتى كانت اتمسحت بالتاج وعلشان كده هجاوبه تانى يا قمر
سلام بقى وأبقى زورينى

Eman Eltaher said...

يسووو حبيبتى انا آسفة انى بصراحة اتضايقت منك ف الأول مش عاشن حاجة بس انا فهمت الكلام غلط او يمكن كنت متنرفزة جدا من كلام الشباب و كان محروق دمى فكنت مش عارفة أميز
أنا آسفة لعصبيتى ف الرد

و بجد انا كل مدى بقى عايزة أتعرف عليكة أكتر و اشوفك باذن الله

تحياتى ليكى