Monday, June 25, 2007

البحث عن صدفة


تأتيها من بعيد..تعرف يقينا انها لها..هي حتما لها..تعرف ذلك لانها بكل قلبها تريدها...تطير في سماء زرقاء فاقعة الزرقة ولاتثبت على لون واحد..هي في الثانية الواحدة تتلون بالف لون وتلك الاضواء البراقة التي تحيط بها تزيد من روعتها اكثر واكثر

تهمس لنفسها:تعالي الي ارجوك

بخوف شديد وقلبها يقفز من ضلوعها تراها تهبط امامها ...اعماها ذلك الكم الهائل من الالوان الساطعة...ذلك الوهج وتلك السعادة التي اتت لا تدري من اين... همست..كل تلك السعادة لي انا وحدي؟؟

فجأة

تسمع صوته..وترى ظله على الارض امامها...تشم رائحة عطره...التفتت اليه وهي مازالت غير مصدقة...

وعندما مد اليها يده بالسلام..مدت يديها وهمست بصوت لما يسمعه غيرها...صدفتي العزيزة شكرا


ارى ذلك الحلم تقريبا كل يوم...وفي كل مرة اراه بنفس التفاصيل ونفس الالوان ونفس الكلمات...وبغض النظر عن الاعادة التي لاتخلو من املال...اكون سعيدة عندما ينزل ضيف على احلامي...ويكون هو الحلم المحترم الوحيد الذي يخلو من مصاصي الدماء الذين يريدون الفتك بي...والافاعي التي تريد التهامي

اليوم استيقظت وانا ممتنة لوجود هذا الحلم من ضمن احلامي القليلة...استيقظت وانا سعيدة لبطلة حلمي..ما أجمل ان تقابلنا صدفة على الطريق..(لا عالبال ولا عالخاطر)..تحمل معها شخصا ما او شيئا ما او خبرا ما او احساسا ما.....بعضا مني يريد لتلك الصدفة ان تجد طريقها الي والبعض الاخر يكتفي بتلك الحياة الهادئة التي تمر بدون مفاجات

احسد بطلة حلمي في كثير من الاحيان على صدفتها الباسمة ولكن ما يواسيني ان الصدف في متناول الجميع وحتى انا

اهمس قبل نومي كل ليلة: انتظرك يا صدفتي

17 comments:

قاسم أفندي said...

شوفتي بقي ان معايا حق اسميكي اميرة الرومانسية
بوست و حلم جميل كله رقة عامل زي الفراشة
تحياتي

nadine said...

جميل قوى البويت ده يا بيسو

اول ما قريت كلمة صدفة
جت فى بالى اغنية عايدة الأيوبى اللى إسمها برضه صدفة
بس صدفة عايدة الأيوبى كانت صدفة فيها ذكريات حزينة

نرجع للبوست
عجبنى قوى صيغة الأمل اللى لونت كلامك
الأمل، الحلم، الفرصة

مش عارفة اللاقى كلم اعلق بيه
بس فعلا البوست حلو
بوست محلق فى السماء زرقاء فاقعة الزرقة

تحياتى ليكِ

lockash said...

الصدفة بنت جميلة راكبة عجلة ببدال.شعرها بيطير قدامها بيداري علينا جمالها. والعاقل لو يلحقها يتبدل بيه الحال.. الصدفه.

و تمشي كمان فرصه ..
كلامك جميل و كلامك معقول ماقدرشي اقول حاجه عنه..

شريف said...

جميل اوى البوست دة بيسو
انتى بجد رومانسية
بوست روعة ومليان احسيس
تحياتى وتقديرى لكى
بس انا زعلان منك اوى او اوى اوى
عارفة لية
لان احنا متعلناش قد المقام
او مش زى الناس اللى انتى ضايفاهم عندك
باين احنا مش زيهم
انتى كدة بتخالينى اسمع عمرو دياب واغنية ولسة بتحبة ياقلبى
ياقلبى حرام عليك

اوكى ياستى براحتك اوى
وتحياتى لكى
لانك فنانة

إنـســانـة said...

يااااااه يابنتى
ايه الحاجات الجامدة دى بس
ولا يبان عليكى اصلا هههههههههههه
لالا حلوة بحد وعجبتنى اوى يا بيسو

تسلم الأيادى وان شاء الله الصدفة تحصل عن قريب كمان
:)
سلام ياجميلة

أنا حر said...

جامد الحلم ده وأجمل ما فيه انك حساه وعايشاه ودايببة فيه كمان
أجمل حاجة في الدنيا لما واقعنا يكون حلم جميل احنا اختارناه
تحياتي

اسكندراني في الغربة said...

ya rab tla2y ele btdwary 3lih

صاحب البوابــة said...

تدوينة جميلة

تجد فيها قمة الرومانسية والبراءة

تحياتي

SAKAyAR said...

بجد بجد رومانسية بابداع ...انتي عارفة بقرأ البوست وأنا قاعد اتخيل المشهد أدامي وبعد ما خلصت قراية حسيت إني أنا اللي كنت بحلم
بجد جميل والفكرة رقيقة أوي
تحياتي

momken said...

كم انت حالمه وناعمه ورومانسيه كما عهدتك دئما
كم انت رائعه
ودائماممتكله ادواتك الرقيه من مشاعر واحاسيس مرهفه
كلماتك جميل وسهله وتمس اماكن لم يصل اليها غيرك

رب صدفه خير من الف ميعاد

تحياتى

بيسوو said...

قاسم افندي
بجد بجد..كلامك ده بينفخني كل اكتر من الي قبلها..ربنا يكرمك

نادين
انا بحب عايدة الايوبي موت..ولازم ندور على الامل في الحلم مادام مش قادرين نلاقيه في الحقيقة..نطق يعني ولا ايه

lockash
هي في الحقيقة الفرصة بس ممكن نمشيها الصدفة ميجراش حاجة معتقدش ان منير يمانع يعني..كله بيخدم القضية

شريف
شكرن جزيلن على الكلام ده..بس مش عايزاك تزعل خالص مالص مني

انسانة
شفتي بقى..ياما تحت السواهي دواهي ابقي تعالي كل يوم

بيسوو said...

انا حر
ايوة طبعا حر هو حد قال غير كدة :)

هو الحلم جامد بس تعرف..انا نفسي الحقيقة هي الي تبقى جامدة والاحلام تفضل مجرد احلام وخلاص


اسكندراني في الغربة
يارب
ترجعلنا بالسلامة..وحاسب من الغربة

صاحب البوابة
تشكرات


sakayar
ياااااه..هو انا تأثيري بقى فظيع كدة على الناس..حاسب بقى لحسن تتعدي مني..ربنا يكرمك

momken
الكلام ده كله ليا انا..
على فكرة انا مش بعرف ارد على الكلام ده كويس...بس ربنا يكرمك ويجبر بخاطرك :)

esraa said...

أنتظرك ياصدفتي

انا كمان منتظراها(:

zordeak said...

البوست حالم جدا ورقيق جدا

بجد بجد انامبهوور

انا قلتلك قبل كده ان اسلوبك بقى راقى اوى وانا بقيت بحب كتابتك
بكرر اللى انا قلته قبل كده


بتعلى يا بيسو بجد

wow

خليتينى اتمنى احلم زيك

:)

moony said...

بسيطة وجميلة فكرة البوست بتاعك ده..يارب تكون كل احلامك اجمل واجمل وتتحق كلها

The Alien said...

حلو كلامك وبسيط
حلم وصدفة
مليان رومانسية هادية بشكل جميل

تحياتي

بنوتة من وسط البلد said...

رقيق اوى البوست بتاعك يا بيسو
وجميل ان الواحد يحس بالهدوء والصفاء ده مع صدفته ومع شريك حياته

بس يا حبيبتى فى الزمن ده مافيش حاجة اسمها صدفة ولا هنستنى

انتى افرشى بس المصيدة على الطريق وهو لازم هيتكعبل فيها غصبن عن عينه

انااقصد الصدفة طبعا .. اوعوا حد يفهمنى غلط :)