Saturday, July 28, 2007

على فكرة...وفكرة


فكرة عاقلة

اعمل ماجستير ودكتوراة..اشتغل واكون مستقلة ...اكون منتجة في مجتمعي..افيد نفسي وافيد غيري...ابطل سلبية في بعض الاحيان


فكرة مجنونة

اكبر للحياة وانفض للناس واطنش كل حاجة..وابطل اتعلم..وابطل اقرأ..وابطل اكتب..واهاجر واسيب الجمل بما حمل


فكرة سياسية

العلم العربي الموحد...العملة العربية الموحدة...اي وحدة وخلاص والنبي


فكرة غبية

اني اشتري عربية دلوقتي حالا


فكرة مرعبة

اني اسوقها


فكرة رومانسية

ان حد يحب حد مش علشان هو جميل ولا علشان انه المفروض يتجوز وخلاص ولا علشان اي سبب في الدنيا...يحبه علشان هو..هو..

يحبه لما يكون صاحي من النوم ولسة مغسلش سنانه وعينه وارمة من كتر النوم..يحبه في لحظات يأسه ويحبه في لحظات حزنه..ويحب عيوبه علشان هي حتة منه..يحبه مش علشان هو..يحبه لمجرد ان ربنا خلقه


فكرة حزينة

اتحرم فجأة من حد حبيته او من حاجة اتعلقت بيها


فكرة سعيدة

اعيش في اسكندرية في كوخ على البحر واسمع محمد منير وفيروز واغنية محمد قنديل ياحلو صبح ياحلو طل ساعة الصبيحة...وطول اليوم معملش حاجة غير اني اقرأ


فكرة خيالية

كل الدنيا يبقى لونها بمبي في سماوي...والسحاب يبقى غزل بنات اصفر وابيض...والنيل بقدرة قادر يتحول لنهر من عصير الليمون..

والبحر يتملي شرايط ستان ملونة


فكرة مزعجة

اضطر اشتغل في البنك اياه علشان ارضي الناس الي حواليا او اعمل اي حاجة مش بحبها ولا راضية عنها لمجرد اني ارضي حد


فكرة مربحة

اخد جنيه عن كل قطرين خبطوا في بعض عندنا هنا في مصر.وعن كل بلاعة مفتوحة..وعن كل منطقة من العشوائيات..وعن كل عصاية في اي قسم شرطة..وعن كل نائب في مجلس الشعب شعبه مش بيشوف طلته البهية غير كل سنة مرة..وعن كل واحد محبوس وهو مش عارف هو محبوس ليه

جنيه عن كدبة اتقالت لنا واحنا صدقناها او عملنا نفسنا مصدقين...جنيه عن كل شاب مصري هرب بره بلده علشان يلاقي نفسه هناك لانه للاسف ضيع نفسه في بلده...جنيه عن كل قرض سافر على سويسرا ويا حرام التحقيق اتحفظ


فكرة عبقرية

جهاز يترجم الافكار في المخ الى كتابة على الورق...توماتيكي..توماتيكي..بدل ما اضطر اصحى في عز الليل كل شوية واكتب بايدي علشان عارفة اني لو استنيت للصبح كله هيتبخر


فكرة غريبة

اربي حيوان اليف وان كان حوض سمك حتى..مش انا خالص


فكرة ختامية

هي شوية افكار كانت طايرة في عقلي وعاملة دوشة وزحمة قلت اصطادها والزقها هنا يمكن مخي يهوي شوية

15 comments:

بندقه said...

عجبتنى الافكار اوى
بس نسيتى اهم فكره واللى دايما مش على بالنا:اتجوز اجيب عيال يملو عليا حياتى....قال يعنى احنا ناقصين وششششش

فكره الجنيه اياه دى ...... بالنص يا جميل

واسكندريه احجزيلى جنبك كوخ

أنا حر said...

افكار جامده بس انتي نسيتي أهم فكرة وهي الفكرة الواقعية اللي بتقول ان يبقى الوضع على ما هو عليه
تحياتي

smraa alnil said...

ههههههههههههههههههههههه

بت انتي
انتي وحشاني اوي
وبطلي بقي تخاريفك دي
قصدي افكراك دي

تصدقي افكارك دي عبقرية بجد

عـلا - من غـزة said...



لا افكار رهيبة بجد

انتي فعلا بتقومي في نص الليل تكتبي الحاجات دي ؟؟

انتي مناضلة فعلا في سبيل الافكار الطيارة

تحياتي وسلاماتي :)

Reemo said...

ايه يا بنتى الأفكار الجنان دى
بصى الفكره الرومانسيه دى منسيه
متفكريش فيها اصلا
الفكره العبقريه دى عجبتنى علشان انا بكسل اكتب والافكار بتطير لما بصحى الصبح
الفكره المريحه دى دخلت دماغى لو نفذتيها متنسنيش فيها
والفكره السعيده هاجى معاكى فيها:)))
والفكره الغبيه هعملها حتى لو كانت مرعبه فى نهايتها
والفكره اللى فى دماغى دلوقتى هى انى بفكر اكتب افكارى
:))))
تحياتى

The Alien said...

فكرة حلوة
البوست اللي إنتي كاتباه

تحياتي

nadine said...

ههههههههه

كذا فكرة من دول كنت بفكر فيهم

الأفكار دى و غيرها موجود جوا كل واحد مننا

بس كل واحد و شطارته، هتعرف تحقق ايه؟

جميل فعلا البوست ده يا بيسو
تسلم أفكارك يا جميلة

بيسوو said...

بندقة
عيال ايه بس في الزمن ده هو احنا لاقيين ناكل لما نجيب عيال ونربيهم..كبري بقى موضوع العيال ده دلوقتي

انا حر
فكرة قاسيةقوي على صعب اقبلها

سمراء النيل
انتي كمان وحشاني قوي..عمري ما هبطل تخاريف انا اصلا موجودة علشان اخرف

علا من غزة
اه والله بقوم فعلا اكتب في الفجر كمان..الافكار تعباني قوي

ريمو
الفكرة الرومانسية اهم فكرة..والفكرة العبقرية دي بجد عبقرية..والفكرة المربحةدي معلش ليا لوحدي اصلي طماعة شوية:)
والفكرة السعيدة اهلا وسهلا بيكي فيها والفكرة الغبية متعمليهاش علشان الي بيسوق دلوقتي مفقود

the alien
تشكرات

نادين
نفسي كلها يانادين..بجد نفسي

سكينة said...

أفكارك في معظمها لطيفة مثلك ما عدا ربط الانتاجية بالتعليم والدراسات العليا..عايزة تنتجي تعالي نعمل عربية كشري
:)
مش عايزة أربي سمك مش هقدر أقاوم أكله في أي لحظة من كثر حبي له لكن فعلا نفسي أربي قطة لكن الجمعية العمومية ولا مجلس الأمن موافق عايزين يفضوا الأرض مش يجيبوا سكان جدد
كان الله في عونك ونصرك على أفكارك ويهديهملك

نفسنا said...

ندعوكم لزيارة العدد الثالث من مجلة نفسنا
ومن لدية القدرة على الكتابة ويريد الكتابة معنا يراسلنا
nafsena@gmail.com

bos bos said...

أنا مررت ليكى تاج حملة أنترنت بلا حدود ياريت تشوفيه وتاخديه

بيسوو said...

سكيننة
ازيك يا حبيبتشي وحشاني...تصدقي بقى ان الفكرة دي هايلة وفيها ايه يعني لما ناكل ونأكل الي حوالينا محنا اكيد هنحتاج ناكل علشان نواصل الحياة..سيبك انتي احنا خسارة في البلد دي

نفسنا
مين ده الي بيعرف يكتب؟؟

بوس بوس
ماشي ياستي نجاوب وماله

bastokka طهقانة said...

فكرة السواقة هايلة و خصوصا لو طهقان عدى من قدام العربية
:))
اوروفوار

kafrawy said...

فكرة جميلة



انا داخل انام


كدة كفاية

انا احمد الله واحمد الناس (أكثر الناس حمدا لله ) ـ said...

بصراحة الموضوع اكثر من رائع ولما قريته بالليل وانا لوحدى بدأت اعيش مع كل فكرة مع الصوت الدافئ بتاع انغام حسيت فعلا ان مشاعرى بتتحرك مع كل فكرة بين الحزن على واقع بلدنا وبين السخرية من الظروف وبين الرغبة فى تحقيق الفكرة العبقرية ....الخ
مرة تانية باحييك على الموضوع الجميل ده واتمنى انك تسمحيلي انى انشره فى مدونتى الخاصة باسمك واسم مدونتك
تحياتى