Wednesday, February 14, 2007

عيد الحب وانا والطناش


المفروض ان النهاردة عيد الحب...بس انا بجد مطنشة..مطنشة جامد..يمكن علشان مفيش حاجة اقدر اعملها في اليوم ده غير اني اراقب الي حواليا...واراقب شلال الاغاني الرومانسية ..والورد الاحمر...والقلوب الحمرا

مجرد متفرجة...بجد انا مش زعلانة وكمان مش مبسوطة...النهاردة مشاعري محايدة

لقيت لوزة النهاردة بعتالي مسج على موبايل اختي بتقولي هابي فلانتين ضحكت من قلبي وبعتلها هابي فلانتين عليكي يا لوزة

افتكرتها السنة الي فاتت لما قالتلي يارب يابسمة السنة الجاية تجيلك رسالة بمناسبة عيد الحب من حد غيري...قلتلها يارب...مرة من نفسي بقى....


انا فعلا مش معترفة باليوم ده علشان حاجات كتير من ضمنها ان الحب مش المفروض انه يتحددله يوم معين علشان نظهره.... المفروض اننا عايشين بيه ...المفروض ان حياتنا متخلاش منه....او يمكن انا غلطانة..مش يمكن علشان الحب مش موجود في حياتنا حددناله يوم معين علشان نستحضره فيه زي استحضار الارواح كدة

علشان هو مش موجود لازم نحتفل بيه لما يبقى موجود..يوم واحد بس...كفاية عليكم انتوا هتنهبوا ولا ايه؟


نفسي ومنى عيني كل يوم يبقى عيد حب...كل يوم يكون احتفالية جميلة

انا مكنتش هدون النهاردة عن عيد الحب كنت هكمل اليوم طناش زي ما بدأته...بس الي خلاني اغير رايي اني كان نفسي احلم بيه امبارح

بس للاسف محصلش..كان نفسي اشوفه حتى وان كنت هشوفه في حلم..انا راضية

ناس هتسألني ايه علاقة ده بده؟

هجاوب واقول اني لما بكتب عنه بشوفه قدامي...سامحوني بقى جت فيكم بس والله مكنش قصدي

مش هقول هابي فلانتين بقى

26 comments:

سكينة said...

قولي واحنا مش زعلانين بدل ما تكبتي في نفسك ويجرى لك حاجة بعد الشر
ثم المدونات الهدف منها الفضفضة في الهوا بعد ما لغوا موضة نشر الغسيل على السطوح
مسكين الإنسان وتعلقه بالأمل وكم تعذبنا الأشواق
وإن كنت حاسدة أحد فهي الناس الجااااااااامدة اللي بتقدر تيجي على نفسها!! يا بختهم ويا رب نبقى زيهم

إنسان || Human said...

ياستي ولا يهمك هو يعني انت لوحدك مقضياها طناش .....انا فعلا معاك في اليوم ده على اساس ان اي حاجه تيجي من بره احنا منقادين ليه بدون اي تفكير ليه فعلا مايكونش كل يوم يوم حب ....بس انا شايف ان ممكن يكون في يوم رمزي خاص بالمحبين يختاروا هما الاتنين حاجه رمزيه كده

soulmate said...

مش لازم عيد الحب يبقى يوم واحد وحتعرفى ده لما تحبى او ترتبطى ان شاء الله كل يوم حيبقى بياكدلك فيه اد ايه انتى غاليه عنده حيبقى عيد حب اول يوم شوفتو بعض حيبقى عيد حب يوم ما ربنا يكتبلكوا انكو تكملوا مع بعض حيبقى عيد حب وقتها اقدر اقولك كل سنه وانتى طيبه انما النهارده مش اظن وبعدين اصلا لو حصل تفتكرى حتفكرينى مش اعتقد حتدينى انا اكبر طناااااااااش

zordeak said...

هابى فالانتاين تو يو يا بيسوو

:p

اااه

فكرتينى بنفسى والله

قاعد انا مطنش وعامل ولا كأن فيه حاجة

بشتغل نفسى يعنى

كل سنة وانتى طيبة

ويا رب تلاقى اللى بتدورى عليه

ونلاقى كلنا اللى بندور عليه


يا رب

:)

يا قلبي يا غريب said...

كل يوم و انتي بخير كل يوم و انتي علي طاعه كل يوم وانتي الي الله اقرب كل يوم ورصيد حسناتك اكتر...اتمني ليكي حاجات كتير و منها اسال الله العظيم ان يرزقك بمن يتقي الله فيكي ..اختاه لا يوجد عندنا عيد للحب ..تحياتي

أخف دم said...

كل ألف سنة وانتى طيبة يا بيسو .. مش عشان عيد الحب لأنه مش بتاعنا وكمان الحب فى كل دقيقة كمان زى ما انتى قولتى مش يوم محدد.. إنما كل الف سنة وانتى طيبة عشان أى لحظة جميلة تمر عليكى وأى لحظة كئيبة كمان عرفتى تعدى منها وتحوليها لسعادة وتجربة حلوة مفيدة..
ربنا يرزق كل واحد باللى بيحبه واللى فيه الخير له.
فينك من زمااااااااااااااااان؟

basma saghir said...

سكينة
ياستي اديني بخرف بدل ما اطق..وبصراحة انا كمان بحسد الناس دي

human
الحمد لله ان في حد مقضيها طناش زيي مش لوحدي يعني...

مشمشة
ايه ياحلويات اللهجة دي..انا برضو من النوع ده
متخافيش ياستي هبقى افتكرك في الاعياد والمواسم..بس لما اقابله الاول

zordeak
وانت طيب مع اني في الاساس تعبت وانا بقول للناس اني مش معترفة بالبتاع ده اصلا
ربنا يسمع منك يا احمد يارب

ياقلبي ياغريب
انا مش معترفة بيه والله
هات مصحف احلفلك عليه

اخف دم
وانت طيب مش علشان عيد الحب...علشان الكلام الي قلته ده..انا فعلا مقتنعة ان حياتي فيها حاجات حلوة كتيير بس انا الي مش قادرة الاقيها
انا موجودة من زمااااااان يا استاذ اشف

أحمد said...

كل جزء من الثانية و أنتى سعيدة يا بيسوو , لأ خليها كل فمتو ثانية و أنتى سعيدة يا بيسوو ومش علشان عيد الحب الوهمى ده لأن أحنا متفقين على أنه مينفعش حتة الأنقياد الأعمى .. ولأن أى حب بييجى لوحده مش مستنى يوم 14 فبراير عشان ييجى أو يتجدد ؛ لأنه هو بييجى لوحده

Nadine Alfred said...

ماشى يا ستى
مش هقولك هابى فالنتين عشان ماتزعليش

عارفة يا بيسوو
انا برضه مش مقتنعة ان الحب بنعيدله يوم واحد فى السنة

بس بتبسط قوى من شكل المحبين
و الجو العام فى الشارع
و الدنيا اللى لونها بيقلب احمر
برضه بحس انه يوم مختلف
غير باقى الأيام اللى الناس على طول بتتخانق مع بعضها
و اعصابها مشدودة

على كل حال
اتمنى تكون كل ايامك حلوة
سلام

Reema said...

happy valentine's day besoooo

برده حاقولك ان الحب مش محتاج عيد عشان نفتكره ولا عشان نحب الحب موجود طول الوقت
بس كل شي بوقته حلو والاحلي انه يجي من غير ميعاد :) فجاءة كده يعني

إبـراهيم ... said...

كل سنة وإنتي أحلى وأجمــــل و أحب يا بسوووم يا جميـــــــــل ، أنا عارف إنها جت متأخرة شويتين تلاثة أربعة :) ...........



بس معلـش



تحياااااااااتي


و ربنا يجيبك بالسلااااامة

قاسم أفندي said...

كل سنة وأنتي طيبة ويارب يتحقق لك كل اللي بتتمنيه

bastokka طهقانة said...

اقترح تغيير اسم عيد الحب الى عيد الطناش

طهقانة

Unknown said...

ايه ده ياجماعه, لأ بجد كده ماينفعش.
كل المدونين اما طنشو الموضوع ده, أو بيتكلمو انهم عملو نفسهم مطنشين, طب ده أنا قلت دي حاله فرديه, واتبسطت لما لقيت واحده متضامنه معايا, انما كله كده؟
علي العموم بضم صوتي لصوت لوزه وان شاء الله السنه الجايه حد تاني يقولك يارب (:

basma saghir said...

مبرمج حر
كل فمتو ثانية وانت طيب يا احمد وصدقني مش علشان العيد ده..

نادين
هو صحيح الدنيا بتتغير في اليوم ده ..بحس اني في شلال من اللون الاحمر
ربنا يسعدكل يوم وكل لحظة يانادوو

ريما
دي احلى حاجة ممكن تحصل لاي انسان

ابراهيم
وانت احلى وانت اجمل وانت اسعد دايما يارب

قاسم افندي
اميييين

bastokka
وانا موافقة جدا جدا

اسراء
يابنتي دي حملة وطنية للطناش ورفض ماهو قادم من الخارج علشان يفكرنا بخيبتنا كل فبراير
ربنا يسمع منك يا اسراء

Tamer Nabil Moussa said...

كل سنة وانتى طيبة

وعيد حب سعيد


وناس كتير اهمتت بالوضوع


انتى فينك بيسو مش بشوفك زى الاول

طمينا عليكى

تحياتى

Tamer Nabil Moussa said...

كل سنة وانتى طيبة

وعيد حب سعيد


وناس كتير اهمتت بالوضوع


انتى فينك بيسو مش بشوفك زى الاول

طمينا عليكى

تحياتى

basma saghir said...

وانت طيب
انا بخير ولله الحمد..هرجع قريب جدا

Memo said...

كل سنه و انتي طيبه
و احنا بنحبك يا ستي متزعليش
تحياتشي

سهر الليالى said...

البوست تلقائى ومافهوش فبكره طالع من قلبك اوى ودى حلاوته
الحب اللى بالك فيه مش موجود اصلا
احتفلى بيه مع حبايبك احسن ماتستنى سنين كتييييييير
:)

سهر الليالى said...

اقصد فبركه معلش غلطه مطبعيه

قاسم أفندي said...

هي صدمة الفلانتين كانت كبيرة كده وخلتك تختفي؟؟
أنا بس مش شايفك من مده فقلت أعدي أسلم وأشرب الشاي

basma saghir said...

memo
وانتي طيبة ياميمو..وانا بحبك اكتر

amany
شكرا على كلامك يا اماني بس انا فعلا حابة اعتقد ان الحب الي بالي بالك موجود

قاسم افندي
مفيش صدمة ولا حاجة...انا بخير وتمام
وراجعة قريب

كلبوزة لكن سمباتيك said...

قال عيد حب قال
حد فاضي و لا عنده نفس
انت فين اخبارك اية؟

يا رب تكوني بخير

basma saghir said...

سمباتيك
ميرسي على التشجيييييع
:)

Nadine Alfred said...

فينك يا بسبوسة؟؟
مختفية فين؟؟