Tuesday, February 12, 2008

وبدأنا في التاجات

أول تاج في 2008 من بوس بوس...واكيد مكعبل مهو الغرض الاساسي من التاجات انها تكون مكعبلة ومعقدة لو كنت اقدر اقول كدة هما في الحقيقة تاجين مش واحد وده من كرم بوس بوس وسخائها

اول تاج سؤال واحد بس

اذا تقدم لكي رجل مطلق هل ستقبلين به عريسا؟؟
بس هو يجي اصل العرسان شاحة اليومين دول... اما بقى موضوع انه مطلق معتقدش اني هقدر احكم عليه من غير ما اعرف اسباب الطلاق الاول..السبب منه او منها..عاشوا مع بعض قد ايه وليه فكروا في الطلاق كحل اخير...ساعتها بقى ممكن اخد قرار بالقبول او بالرفض...بس مقدرش ابدا ابدا احكم عليه انه انسان وحش من غير م اعرف كل الحاجات دي اذا كنت انا بلوم الناس الي بتبص نظرة دونية للمطلقات وبتعتبرهم خطر داهم على المجتمع فا اعتقد ان الوضع مش هيختلف مع الرجالة ....مش برضو عندنا مساواة بين الجنسن.قولوا مش عندنا...طبعا عندنا


التاج التاني بقى شوية اسئلة اكثر تكعبلا من السؤال الي فات


هل توافق على حزف خانة الديانة من البطاقة الشخصية ؟
لا طبعا مش هوافق ابدا...فخورة جدا اني مسلمة


ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
رايي ان دي حاجة منافية لفطرة ربنا سبحانه وتعالى...وبجد مش عارفة اذا كان ده مرض نفسي ولا دي ناس بتستعبط..معتقدش ابدا انها حرية شخصية لاننا مش احرار حرية مطلقة مهما كانت مساحة حريتنا وانا واثقة ومتأكدة ان الي بيعملوه بيزعل ناس كتير وبيأذيهم وقبل اي حد ربنا سبحانه وتعالى..
اوافق او موافقش هما موجودين ودي حقيقة...مليش اصحاب ومش عايزة يكون ليا ..متشكرة جدا


هل تعتقد بوجود إضطهاد للمسيحين فى مصر ؟
فين ده؟؟ !!


من هو الشخص الذى تختارة لرئاسة مصر ؟
بكل حرية وبكل صدق وبكل اعتراف بالجميل للي حصل وللي هيحصل..السيد الاستاذ الرئيس حسني مبارك ومن بعده السيد الاستاذ الرئيس برضو نجل سيادته جمال مبارك
يخرب بيت دي اسئلة انتو عاوزين تودونا ورا الشمس شكلكم كدة


إذا قت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟هل توافق على مشاركة كل من : الإخوان المسلمين - الأقباط فى الحكم ؟
كبير قوي الموضوع ده عليا..بس لو ده حصل ممكن اعمل رباطية بقى واعيش في برج عاجي او برج القاهرة واعين قرايبي وقرايب قرايبي وجيرانهم وحبايبهم واصحابهم وولادهم وصحاب ولادهم .... هخرب البلد يعني وهيبقى النصر لحلل الكوسة وصواني الكفتة مش زي دلوقتي خالص يعني
هوافق طبعا على الاقباط والاخوان المسلمين..مش احنا كلنا في مركب واحدة ولا ايه... ومحدش هيقدر يفتح بقه معايا والي هيفتح بقه هحاكمه محاكمة عسكرية..ويعدم


فى رأيك الشخصى .. ما هى أفضل مدونة على بلوجر قمت بزيارتها ؟
يووووووه في كتير وفي مجالات كتير وكل مجال فيه ناس كتير...يعني لو عدتهم مش هخلص


اذا تزوجت وأنجبت ولدين وبنتين .. أى الأسماء تحب أن تسمى ؟
كل شوية يعجبني اسم شكل واقول خلاص هو ده..بس اخاف لحسن الراجل الي هيتجوزه يكون بيحب ماماته ولا حاجة وهي يكون اسمها عطيات ولا فتاكات ولا ست ابوها ولا اي اسم منيل فوق دماغهم ويبوظ كل احلامي وتطلاعاتي
طيب...علشان بس ميزعلش مني
البنات: فتحية..جمالات..نحمدو..سعدية
الاولاد:مرسي..زينهم..عطوة..عبد الجبار

هل تعتقد أن توريث الحكم فى مصر . . سيتم فعلا أم لا ؟
بيهرجوا دول ولا ايه...طبعا يلي بتسأل انت ده شئ مؤكد واحنا نتمنى ان سيادته يحكمنا بعد سيادته ما ربنا يكرمه ويسكنه فسيح جناته...هو احنا نطول

شكرا يابوس بوس

9 comments:

علا من غزة said...


ههههههههههههههههههههههههههههههههه
الله يسامحك يا بيسو ضحكتيني لغاية ما بطني وجعتني

لووووووووووووول

Anonymous said...

هههههههههههههههههههه روووعة
اجابات تحفة يا بيسو

:)))))))))

Anonymous said...

ههههههههههههههههههه
يخرب عقلك ضحكتينى جامد

وبعدين أيه الأسماء دى حرام عليكى هتعقدى العيال كده

تحياتى لكى وشكرا على اجابة التاج

Eman Eltaher said...

ههههههههههههههههه
و الله بيوحشنى اقرا كتاباتك و خفة دمك الرقيقة
واللى بيعجبنى أكتر منك رومانسيتك المعهودة
و كتاباتك اللى بتخلى الواحد يسبح ف فضاء تانى

أنا كيييييييييت
ومعلش جييييت متأخر بس بجد أول مدونة أقرر أزورها بعد الغياب

simply me said...

اممممممم
تاج جديد وفريد من نوعه
ولا الاجابات مش ممكن خالص

فتحي الشيخ said...

انتي فعلا تستهلي تاج عظيم بس انا خايف يبصلك فيه السيد الاستاذ الرئيس او نجل السيد الاستاذ الرئيس .... بعدين دي بلدهم و سلومة الاقراع ما يعرفش ابوه .. انا اسف

basma saghir said...

علا
سلامة بطنك ياعلا...بس مادام ضحكتني مش مهم وجع البطن

3asef
شكرا على انك استحملت وقريتها :)

بوس بوس
مش احسن ما اتعقد انا
شكرا علىالتاج الحلو يابوس بوس

ايمي
وحشتيني قوي يا ايمي...والكلام ده كله على فكرة هيخليني اخد قلم كبير قوي في نفسي..متغيبيش كدة تاني..بتقطعي بيا والله

بندقة
ميرسي بالكوم

فتحي الشيخ
انشالله لو كان سلومة بشعر وشعره واصل لغاية ركبه...دي بلدنا كلنا مش بلدهم هما بس

momken said...

ههههههههه
جميل والله ردودك منتهى خفه الدم والدبلوماسيه
انتى مرشحه وزيره خارجيه ولا ايه

الله يرحمك ياست بنازيربوتو

الساحه فضيت من بعدك
تحياتى

موجة said...

مش عارف ليه حبيت اقرا اجابات التاج دا عندك في الاول
ممكن لاني اجبت عليه فعايز اعرف راي الناس و وجهات النظ المختلفة
بس تجاباتك فيها وعي واضح و ادراك
لكن فيها واقعية شديدة تقارب نوع من الاستسلام للولقع جاءت به اجابة سؤال من تختار لحكم مصر

خالص تحياتي
احمد