وصلني تاج من علياء صاحبة مدونة..ساالخير وعايزة تعرف عني خمس حاجات محدش يعرفها....مش عارفة ايه الفضول ده؟؟
لا خلاص مش هكسفك...هعترف
والمفروض اني امرره لخمس اشخاص هبقى اقول عليهم في الاخر
اولا: وزني يا اختشي محدش في الدنيا دي يعرفه غير ربنا ثم الدكتور بتاعي وبما اني في صراع مستمر مع الوزن ما اظنش ان حد هيعرفه ابدا فا متفرحيش قوي وتفتكري اني هقوله ولا حاجة..بس اهو حاجة من الحاجات...المشكلة ان بخس جدا وارجع الي نزلته من تاني وفوقهم بوسة
ثانيا : محدش ابدا ابدا يعرف اني اول ماجيت مصر جالي اكتئاب حاد لدرجة فكرت اني اروح لدكتور نفسي لاني من الناس الكتومة جدا جدا ومحدش قدر يعرف ان عندي اكتئاب ولا حتى لوزة لانها هي كمان جالها اكتئاب زيي
كرهت مصر وكرهت المصريين-محدش يزعل مني- وحسيت اني مش من هنا تماما يعني غربة جوة الوطن
المهم ان الموضوع عدي بسلام وبدون خسائر عقلية الحمد لله وقدرت اني اتأقلم واتكيف..ليه؟ لان دي الطبيعة البشرية ياجدعان.... معروفة دي
ثالثا : اول مرة وريت لماما حاجة كتبتها كنت في اولى اعدادي كان موضوع تعبير وطبعا كان الاسلوب زي القرف اتريقت عليا كتير جدا لان الموضوع كان مليان بكلمة ثم.....ثم حصل...ثم فعل...ثم راح...ثم رجع
كدة يعني......ومن يومها وانا مورتهاش حاجة تانية ابدا...كنت بوريي لمدرساتي ولاصحابي ماعدا ماما لاني مقدرتش انسى ليها الي عملته...اي نعم امي وكل حاجة بس برضة مقدرتش انسى الي حصل مع اني قلبي ابيض والله...ولغاية يومنا هذا ماما معندهاش فكرة تماما ان ليا علاقة بالقلم ولا اني بكتب وكتاباتي احلى كتابات في الدنيا.....محدش يصدق
رابعا : بعرف اعمل ورق عنب كويس جدا بس بستهبل وبدعي اني مبعرفش علشان ماما متزنش عليا اني اعمله
وبعرف اغير البامبرز للاطفال وبرضو بستهيل وبقول لخالتو اني مبعرفش علشان متخلنيش اغيره لكوكو ابنها..ولمن لايعرف كوكو فهو انسان بقاله في الدنيا دي 3 شهور بس وبيعيط من دلوقتي...تخيلوا
وساعات لما بشوفه بحس اني هعيط وبدمع فعلا..ليه؟......الله اعلم...بس يمكن بيصعب عليا ولما خالتو بتسألني في ايه بقلها...... دي عيني اتطرفت ياخالتو الله بقى
خامسا : رومانسية شوية..مش كتير يعني سنة رومانسية كدة بس اي حد يعرفني يقول غير كدة.....وبحب الافلام الي بيتخللها رومانسية يعني متكنش القصة اصلا رومانيك تبقى اكشن دراما اي حاجة بس يبقى فيها السنة دي
السنة دي بقى هي الي فيا
معلش يا علياء انا مضطرة اخالف التاج واعمل سادسا لانها مهمة
سادسا : بعيط بليل بدموع كتير قوي زي الاطفال لما بتبقى ماما وحشاني
بس خلاص
احب اسلم المايك ل:
كلبوزة لكن سمباتيك
NaDo0o0o0o
مبرمج حر
Saturday, January 27, 2007
صباح الاسرار...من علياء
Subscribe to:
Post Comments (Atom)
4 comments:
شفت التاج الحلو ده و قاعد أكتب فيه دلوقتى
تحياتى لكى يا بيسوو
كل دى ثم اية يابنتى انتى خلتى البوست كلة ثم حتى انا افتكرت انك بتكلمى وعايزة تعرفينا بالكلمة الغامضة ثم
ههههههههههههه
بوست زى العسل بيسوا وبعدين ياستى اكتبى كل حاجة وفى اى حاحة المهم تكونى نقتعة بما تكتبية
واحلى حاجة حكاية ورق العنب لانى بموت فية
تحياتى
اوبا التيجان نازله ترخ في البلوجات يالا بقه خلينا نشوف المستخبي عند كل واحد ::)) ;)
بالتوفيق يا احمد
tamer
سعيدة ان البوست عجبك..وربنا يستر وماما متعرفش موضوع ورق العنب ده
vero
لسة المستخبي كتييييييير
Post a Comment