Monday, January 15, 2007

احساس

مش عارفة ليه حاسة اني محتاجة لحد..اي حد يسمعني حتى لو حد معرفوش المهم اني اقول..ولو اني بصراحة مش عارفة هقول ايه..بس لازم هجيب كلام من اي حتة..اصلي مليانة كلام وعايزة حد ادلق الكلام ده عليه

امبارح اتكلمت معاه..مع اني معرفوش كويس بس لقيت نفسي فتحت جامد في الكلام معاه اتكلمت معاه في كل حاجة تقريبا اهدافنا وميولنا بنحب ايه وبنكره ايه.. حاجات كتير..كتير قوي
عمري ماشفته في المود ده قبل كدة كان دايما متحفظ معايا وكل كلامه رسمي..حضرتك..وسيادتك ويافندم ويا استاذة...بس يومها مش عارفة ليه حسيت ان كلامه طالع من القلب مع انه مشالش التكليف وانا مقدرتش اقله شيله
الغريبة اني حسيت اني مشدودة ليه قوي ... حسيت اني محتاجة اسمعه ونسيت اني عايزة اتكلم
نسيت اني متضايقة نسيت كل حاجة ومفتكرتش غير اللحظة الي كنت فيها معاه
ولما قالي انه قفل على كل حاجة علشان يكلمني...جالي وجع مفاجئ في بطني وكهربا في جسمي كله...يمكن هو محسش بلي حصلي ده بس ميهمنيش المهم اني عشت اللحظة دي..عشتها بكل تفاصيلها وكنت فرحانة قوي...فرحانة لدرجة بقالي كتير موصلتلهاش....
حاولت اني مكنش رومانسية..حاولت بجد..بس بعد ماقفل معايا فكرت فيه كتير جدا واسترجعت كلمة كلمة قلناها حتى لو كانت كحة او نحنحة...علشان احنا الاتنين كان عندنا برد وربع كلامنا كان كحة...حتى كحته فاكراها..كانت حلوة قوي عجبتي
قالي كمان حاجة ضايقتني...انه بيدخن بس مش كتير افتكر كدة انه بيهون الموضوع عليا بس على مين انا مش بطيق التدخين قعد يقولي دي سيجارة واحدة كل اسبوع والله
عملت نفسي مش هاممني بس انا كنت متغاظة منه قوي وفي نفس الوقت كنت فرحانة انه شاركني بحاجة..اي نعم حاجة مش كويسة بس اهي حاجة والسلام.......حسيت اني قربت منه...وحسيت انه عايز يقرب مني..........
بس بعد ماقفلت معاه معرفش ليه اتملكني احساس بالذنب قرب يضيع كل الاحاسيس الحلوة الي خليتها تدخل قلبي....خوف واحساس بالذنب..يمكن علشان كنت وعدت قلبي وعد وخلفته اتهيئلي اني خنته وموفتش بوعدي ليه...بس هو حصل ايه يعني...مجرد كلام عادي جدا...هو ده الكلام الي بقوله لنفسي علشان ابررلها...ولسة بحاول مكنش رومانسية
هو ممكن يكون شغف اهتمام او حتى فضول او ممكن يكون اشتياق لمشاعر معينة...لا..خليني اكون واضحة هو مش اشتياق..علشان الاشتياق بيكون لحاجة عدت عليك وفارقتك..بس عمرك ماهتشتاق لحاجة متعرفهاش...هو في الحقيقة احتياج........اديني كتبت الكلمة الي بخاف حتى انطقها او افكر فيها..........
خايفة قوي ومعرفش خايفة ليه

24 comments:

مبرمج حر said...

دى تانى مرة أجى هنا و المرة دى مش هاعلق كمان
أنا جاى أسمع زى ما أنت عايزة و بتقولى فى أول البوست
بس فى حاجة .. البوست أسمه أحساس مع انه ستين أحساس مش احساس واحد بس
(;
تحياتى ليكى يا بيسوو

بيسوو said...

شكرا علشان سلفتني ودنك وسمعتني

هما فعلا ستين احساس بس في احساس واحد متسألنيش ازاي

انا لسة مصممة اعرف اسمك ايه

مبرمج حر said...

ههههههههههه
يعنى تانى مرة أجى عندك و لا حتى تجبيلى حاجة ساقعة
مش هاقولك الا لما تجيبلى الحاجة الساقعة الأول
على العموم خلى الحاجة الساقعة البوست الجاى
وأنا أسمى أحمد يا بيسوو
:)

كرانيش said...

انتى ليه رابكه نفسك وقاعده تساليها اسئله قد تكون عبء عليها سيبى الحياه تمشى طبيعى متعقديهاش

بيسوو said...

بحاول يا كرانيش بس مش بقدر امنع عقلي من التفكير

على راي جماعة اصحابي مش من هنا
طنش تعش تنتعش
بحاول

Sampateek said...

انا قلقانة عليكي
انت كده داخلة في حارة سد


اعجاب و بعدين حب و بعدين؟؟؟

حلخصلك الليلة في جملة


ليس كل ما يلمع ذهبا


حكمي عقلك

بيسوو said...

معاكي حق يا سمباتيك

وصدقيني بحاول احكم عقلي انا اصلا دايما بحكم عقلي

بس انتي بجد وحشتيني ....غبتي كتير

nadine said...

بيسو

تعبت مالمذاكرة قلت اقضى وقت و ازورك

تصدقى انى برضه مريت بالإحساس ده

و برضه خفت

بس زى ما كرانيش قالت

قررت انى اسيب الحياة تمشى عادى

و انا كمان اتصرف عادى

اسلوبك فى البوست ده لمسنى قوى

يلا سلام

Human said...

بيسو حبيبتى
مش عارفة ليه كلنا بنخاف
انا بخاف لدرجة الهروب من الشعور والاحساس ومن الشخص نفسه
حتى لو كان بيحبنى بجد
مش عارفة ليه


مش عارفة انصحك لانى محتاجة للنصيحة
بس اديكى فضفضتى وانا سمعتك
سـلام
:)

بيسوو said...

وحشتيني كتير يانادين
واكيد مفيش في ايدي حاجة غير اني اسيب الحياة تمشي عادي..مقدرش اعمل غير كدة

human
لو عرفنا بنخاف ليه صدقيني هنبطل نخاف
او ممكن نخاف اكتر واكتر
كلام عميق مش كدة؟؟؟
يلا اديني بخرف

VEЯŎ said...

besoo gamela

إبـراهيم ... معـايــا said...

الجميــــلة بيسو ، نحتاج كثيرًا لهـذا ( الحـــد) ، الذي تكلمت عنه أنغام ، فيأغنيتها الجميـلة ( إلقالك حـد) ! ، وأنا كذلك ، قادني القدر إليها ، يمكن دي أول مـرة اتكلم عنها !!! ، فتحت لي قلبها جـــدًا ، وفتحت لها قلبي على حــذر !!! ، صحيح مش عارف هنروووح على فين !!بس ببنبقى محتاجين ده جــدًا !!!


شكرًا من عندك هنا له ، ولهــــا !


ولكِ أيضًا . . .


وابقي عدي على مدونـك كثيييير !!!

تحياااتي ...

على فكرة أنا مش لوحدي ... أنا ..معـايا:)

شجره الدر said...
This comment has been removed by the author.
شجره الدر said...
This comment has been removed by the author.
شجره الدر said...
This comment has been removed by the author.
شجره الدر said...

بيسو بسبوسه بسابيسو
بصى بقى ياقمره
انتى ممكن تكونى بتحبى جديد
وممكن تكونى داخله على صداقه حلوه قوى
والتغير مطلوب يعنى
اصل من غير ناس جديده نعرفهم ونسمعهم ونضفض معاهم الدنيا هاتبقى وحشه قوى
بيتهيألى
انك كنتى محتاجه حد يسمعك
وعلى العموم احنا تحت الطلب ياقمره
من شجره الدر مصر القديمه قصر الصالح ايووووب

شجره الدر said...
This comment has been removed by the author.
tamer said...

الخوف شعور انسانى

جميل ان يخاف الانسان دة شىء ايجابى لكن لو زاد عن الحد المسموح بة اصح سلبى


اهم شىء اعرف انا عايز اية والاحساس اللى جوايا دة اية ولية وهو بالنسبة ليا اية وعلية اقعد مع نفسى لحظة واخد قرار ممكن يوصلنى لحل ارصضى عنة ولا اشعر بعدة باالخوف

تحياتى

ALiaa said...

السيناريو دا حصل فييين حصل فيييين؟؟؟؟ اه افتكرت,,, حصل معايا
:)
بعد شد و جذب سنتين و شعور بالحب و الذنب و تخبط مازلت بعاني تبعاته قررت اني ماعملش حاجة أبدا الا بشعور كامل من الرضا

اذا حار أمرك في معنيين و لم تدر أين الخطأو الصواب.......فخالف هواك فان الهوي يقود النفوس الي ما يعاب.............. رحم الله الشافعي

أقول لك: عيشي الحب و ماتشيليش هم بكرة.... بس خدي بالك.... هتبقي مسؤوليتك الخوض في المغامرات
هتعيشي ماشية جنب الحيط...مش هتتألمي بس مش هتحسي بطعم الحياة
هتغامري في الحياة,,, ممكن تتألمي ..بس هتحسي بطعمها

بيسوو said...

vero
انت اجمل
...........
ابراهيم
القدر هو الي بيخلق احلى الاحداث في حياتنا نصيحة مني...لو متأكد من اي حاجة متخافش ومتخليش الحذر يقيدك..مش مهم هتروحوا فين المهم الي في القلب
....................

شجرة الدر
مفهمو الصداقة الي انتي قلتي عليه قلل خوفي كتير جدا لما فكرت فيه..حسيت انه اخف حدة من موضوع الحب..ومش هخسر فيه كتير
وشكرا علشان سمعتيلي
سلامي ليكي
................
tamer
انا بخاف علشان مش عارفة ايه الي بحس بيه ده؟
وبخاف علشان مش بقدر اعرفه ولا اصنفه
ولو كان الموضوع سهل كدة مكنتش خفت صدقني
سلامي ليك
............
علياء
افضل ان انا اعيشها واتألم واحس بطعمها لاني جربت اني مش اعيشها واجنب الالم بس الدنيا مكنش ليها اي طعم
عجبني كلام الامام الشافعي جدا

قاسم أفندي said...

جميل جدا شعور البنت عندما يقترب أحد ما من قلبها وانتي قدرتي تعبري عن الشعور ده بروعة وصدق
ده بالنسبة للي مكتوب ككلمات
اما بالنسبة للأحساس بقي فاسمعي بقي يا ستي الحب الحلو اوي وجميل خالص مالص بس المهم نشغل عقلنا مع قلبنا ومنلغيش واحد فيهم ولما العلاقة توصل لمرحلة التصريح بالمشاعر بين الطرفين لابد الأهل هنا وهناك يعرفوا وميبقاش في حاجه في السر
ليه بقي؟؟
لأن الأثم ما حاك في صدرك وكرهت أن يطلع عليه الاخرين
ربنا يوفقك يارب ويكتب لك الخير
أنا صحيح أول مرة أزورك بس قلبي أنفحتلك معرفش ليه عشان كده رغيت كتير شوية بس جايز يكون نتيجة احساسي بالصدق في كلامك

قصاقيص said...

الله علي الوضوح والشفافيه
علي فكرة كتير مننا بيخلف وعوده مع قلبه علشان الاحتياج ... بس لازم تعرفي حاجه.... لو خلفتي الوعد علشان حاجه جميله يبقي ده في حد ذاته وعد جديد بالحياة
جميله وحساسه وبالتوفيق

بيسوو said...

قاسم افندي
شكرا على رأيك للي مكتوب ككلمات
اما بالنسبة للاحساس معتقدش انه وصل لدرجة حب واتمنى انه ميوصلش
وبعدين ياسيدي ارغي زي ما انت عايز انا اصلا بحب الناس الرغاية

قصاقيص
كلامك مريح جدا ياقصاقيص

يا قلبي يا غريب said...

كلامك كتير فيه مشاعر كتير فيه صدق كتير بعيد عن الواقع..بس اكتبي و طلعي الي في قلبك.