Thursday, December 21, 2006

ملاحظات

او لا احب اشدد على اني بحبها جدا..بالشوارع والناس والنيل
........................................
ندخل بقى في الجد:
مش ملاحظين ان العربيات الكارو زادت قوي اليومين دول..ومخلفات الحمير والاحصنة زادت بشكل ملحوظ جدا
لدرجة ان الارض المفروشة اسفلت بقت متسمدة كويس جدا لدرجة تنفع للزراعة اهو برضو احسن من السماد الكيماوي ...ماعلينا
...........................................
مش ملاحظين ان السي تي ايه الي المفروض انه مكيف و ان الاجرة بتاعته متحددة على الاساس ده مبقاش مكيف على طول..طبعا انا مبتكلمش على الزمهرير ده بس ايام الصيف كان كدة ...المشكلة انه مبقاش مكيف بس اجرته"يبقى الحال على ماهو عليه
.........................................
مش ملاحظين ان اي معاملة حكومية في مصر عمرها ما بتخلص في يوم واحد...ده حتى كارنيه الكلية لازم يبات عند الشؤون مش عارفة ليه
رحت مرة مع لوزة صحبتي علشان نعمل ورق يخصها في شؤون الطلبة المدام المسؤولة عن الورق قالتلنا تعالوا بعد اسبوعين بجد احترمت الست دي جدا علشان حددتلنا يوم معين نيجي فيه...المهم اننا رحنالها بعد اسبوعين قالتلنا والله الورق لسة مخلصش قلنلها نيجي امتى؟ قالتلنا والله مش عارفة تعالوا كل يوم لغاية واسألو...بالذمة ده كلام ناس عاقلين..عايزة اقول للمدام دي من موقعي هنا:
ياطنط انتي فاكراننا ناس فاضية ولا ايه احنا ورانا محاضرات..ياطنط اتقي الله فينا وكدة على فكرة حرام
..............................................
مش ملاحظين ان الملاحف والاسدالات كترت قوي..وده بيكون دليل طبعا على ان البنت متدينة..على فكرة ده مش رايي ده الراي العام
في يوم جاتلي مكالمة من لوزة بتقولي خبر عجيب جدا...انا لبست الاسدال هو مش اسدال هو في الواقع ملحفة والفرق بينهم ان الملحفة اوسع من الاسدال مع ان الاسدال واسع جدا جدا
المهم بعد ما قالتلي وانا في حالة صدمة لانها عمرها ماجابت سيرة الموضوع ده
المهم انها في اخر المكالمة قالتلي ربنا يهديكي وتلبسيه .......بعد ما قفلت فكرت مع نفسي ربنا يهديني ازاي يعني هو انا ضالة وعايزة ربنا يهديني اي نعم كلنا محتاجين هداية ربنا ف حاجات كتير بس انا مش بلبس لبس خارج الحمد لله انا محجبة وكل لبسي طويل وبكم ومش بلبس بناطيل اصلا...كلمت لوزة تاني وسألتها..هو انا مش محترمة بلبس ي ده........هو اي بنت مش لابسة اسدال مبتبقاش محترمة خلاص او مبتبقاش متدينة..بس انا والله متدينة وبعرف ربنا كويس جدا والحمد لله مع اني مش لابسة الزي المذكور اعلاه
ياناس حد يقولي ؟؟؟
..........................................................
مش ملاحظين ان الناس بقت عاملة زي البقدونس بتتدخل في كل حاجة
من يومين كدة دخلت مكتبة وقلبت في الكتب علشان بدور على كتاب مفيد اقراه بس للاسف اكتشفت ان مخي عطلان اليومين دول وماليش مزاج اقرى حاجة مفيدة..فققرت اني اشتري مجلة ميكي.....اه ميكي فيها ايه دي؟؟ غريبة قوي دي؟؟ عادي جدا
اشتريت العدد الاخير وانا مبسوطة جدا لقيت صاحب المكان بيبصلي باستغراب وبيقولي عندي كتب هتعجبك جدا...وانت مالك يا اخي انا عايزة ميكي
تلاقيه بيقول دلوقتي ايه العبيطة دي؟..............وماله ياسيدي انا عبيطة حد شريكي..عبيطة عبيطة بس اقرى الي على مزاجي
........................................................
مش ملاحظين اني طولت قوي

5 comments:

Amr Ahmed said...

بيسو

مدونتك جميلة

بس الموضوعات اللي اخترتيها كل واحد ممكن يبقي بوست لوحده

كلها موضوعات مهمة وحتاجة عرض اكبر من كده


اتمنالك التوفيق

بيسوو said...

انا متشكرة على كلامك بس ياريت توضحلي اكتر من كدة...الظاهر ان فيروس الغباء وصل
ايه ملاحظتك بالضبط

بيسوو said...

على فكرة انا جديدة في عالم التدوين واي حاجة هتقولها ليا هتفيدني جدا
بس اوعى تكون بخيل ومتنصحنيش

islamz said...

بيسوو :
=======
اولا احب اقولك انى افتكرتك ولد فى الاول واسمه عباس كمان .. ههههه
بس اكتشفت غلطتى فى الوقت المناسب .. اصل ليا واحد صاحبى اسمه احمد عباس بقوله يا بيسوو ...

ثانيا .. موضوعك فعلا جامد .. لقطات من الواقع ، مشاكل رخمة من الشارع والجامعة وكل حتة .. كلنا بنقابلها كل يوم تقريبا .. واحييكي على سردها بالشكل ده

بس احب اوضحلك حاجة .. شفتى عمر بيقولك ان كل جزء من البوست ده ينفع فى موضوع لوحده .. عارفة ليه .. علشان فعلا كل موضوع محتاج نتكلم عنه براحتنا .. ونقول اللي بيضايقنا فيه

يا رب تكون الفكرة وصلتك .. وتحياتى لاسلوبك الجميل

سلااااااااامز :]

بيسوو said...

هي فعلا الفكرة وصلتلي ...استوعبتها بعد مدة..علشان فيروس الغباء اكيد انت عارف
بس زي ما عنوان البوست بيقول دي مجرد ملاحظات...واكيد هيكون في بوست لكل واحدة ياريت تصبروا عليا انا لسة بقول ياهادي
عموما انا بجد بجد متشكرة على رأيك الي انا فعلا محتاجاله ومتشكرة اكتر انك افتكرتني عباس...هو عباس ده شكله ايه
متغيبش عني يا اسلام