Sunday, November 25, 2007

اللوحة


تبدو اللوحة هادئة…تبدو الشمس دافئة…وتبدو الوجوه مطمئنة…وتبدو السماء صافية على غير العادة
اعجبتني تفاصيل اللوحة...تلك السكينة والسكون...نعم..هي طبقة رقيقة من السعادة تغلف الاشياء هذه الايام

في ذلك اليوم بالذات استيقظت لأجد ان لوحتي قد لطخت بفعل شخص ما او شئ ما...هو خط اسود رفيع يكاد لا يلحظ ولكني اراه...وتراه كذلك الوجوه المطمئنة التي لم تعد كذلك...قررت اني لن ادع ذلك الشئ يفسد لوحتي
سوف اتجاهله هكذا فكرت...ستظل لوحتي هادئة ..وستظل شمسها مشرقة

بمرور الايام كبر ذلك الخط الاسود واصبحت عدم ملاحظته شئ صعب...تفتت طبقة السعادة الرقيقة بفعل ذلك الخط...واصبحت الوجوه تعلوها الحيرة ومن ثم الوجوم..ومن ثم الحزن...ادركت انه من البداية كان الحزن يحوم حول لوحتي وينتهز الفرصة لكي يأخذها مني...احببت تلك اللوحة بكل ما اوتيت من قوة..فقد كانت بالننسة لي رمز للسعادة المفتقدة في العالم من حولي
خرجت اللوحة من حياتي وخفت بعدها ان اقتني اي لوحة اخرى...خفت من الحزن..وخفت من عدم رؤيتي للاشياء على حقيقتها...خفت من اسرافي في الاحلام..تلك العادة السيئة التي اكتسبتها مع الايام

مرت فترة صمت طويلة في حياتي..الى ان فاجأتني الاخبار السعيدة بطريقة لم اعهدها من قبل...صديقتي من ايام الطفولة خطبت منذ ايام قليلة..لم ارها من سنة كاملة او مايزيد عن ذلك...باعدت بيننا الحياة ولم نعرف اننا ابتعدنا الا حينما سمعت صوتها واحسست انه يأتي من الماضي
ذهبت الى حفل الخطوبة البسيط...طالعتني صورنا في ارجاء حجرتها الصغيرة... ونحن اطفال..ونحن مراهقات..ونحن سعيدات..ونحن محبطات ومكتئبات..حياة كاملة..ذهبت ولن تعود...وللمرة الثانية اختبرت احساس الحزن وهو يشوه شئ جميل..تذكرت لوحتي التي لم الحظ انها تنهار الا في اللحظات الاخيرة...تملكني الخوف مرة اخرى...وركضت اليها احتضنها وابارك لها ومن وسط دموعي الشفافة التي لم يرها احد و الزغاريد التي ملئت الشقة همست لها وانا اضمها الي بقوة اكبر....سامحيني على المسافات

15 comments:

Unknown said...

بيسو اولا حمد الله ع السلامة وبجد وحشتينى اوى

البوست حزين ووجعلى قلبى بس عايزة اقولك حسى بطعم الفرح فى حياتك .. زى مافى حزن في فرح وفى أمل وفى حياة

دى قوانين الحياة زى مافيها الحلو فيها الوحش والاتنين موجودين

لازم نتعلم ازاى نصبر ع الوحش ونستمتع ونفرح بالحلو

ربنا يجعل ايامك كلها فرح ويحلي ويسعد أيامك اللهم آمين

Tamer Nabil Moussa said...

قصة جميلة وسرك اكثر من رائع

ربنا يوفقك ويكرمك


تحياتى

Reema said...

مين قالك بقى يابيسوو هانم ان الاحلام عادة سيئة

فكري تاني وعيدي النظر في الموضوع ده

لو بطلنا نحلم نموت يابيسوو سلامة قلبك ياجميلة

...وحشتيني :)

شجره الدر said...

مش عارفه ليه عيونى دمعت وانا بقرا البوست ده
حقيقى احنا مش بنشوف الليل وهو جاى مجرد خط اسود خفيف فى السما وبعد كدا هووووب السما سودا
لكن برضه احنا مش بنشوف النهار
خط ابيض رفيع
وهوووب
النيا نهار
تحياتى

basma saghir said...

انسانة
والله بحاول...احيانا بنجح واحيانا بفشل واديني عايشة...انتي كمان وحشتيني جدا

تامر
ويكرمك ياسيدي

ريما
ليكي وحشة كبيرة جدا...
الاحلام بقت عادة سيئة اليويمن دول بس..بس زس ماقلتي لو بطلنا نحلم نموت..علشان كدة مش ببطل احلام

شجرة الدر
سلامة عيونك...احنا كدة دايما مش بنشوف غير تحت رجلينا

تخاريف خاصه! said...

ماشاء اسلوبك اكثر من رائع...

هكمل فى بقيه المدونه...
:)

تحياتى

مدونه يلا نفضحهم said...

تتشرف اسرة يالانفضحهم
بدعوة سيادتكم لافتتاح مقرها بالاسكندرية
مركز ضحايا
للاستشارات القانونية والتأهيل النفسى

محاضرة بعنوان مبادىء واساسيات حقوق الانسان

وورشه عمل لتقسيم فريق الاسكندرية وذلك يوم الجمعة اوافق 14/12/2007 فى تمام الساعة الواحدة ظهرا

العنوان :- 9ش مسجد الايمان متفرع من شارع اسكندر ابراهيم خلف جزارة الزهيرى - ميامى - الاسكندرية
ت:- 5484897 - 0166885063

Eman Eltaher said...

كالعادة
احساس جميل
شعور معبر و كلام بياخد الواحد من نفسه

وحشتينى اوى يا بيسوو و بجد من كتر ما انا حاسة و كإنى أعرفك من زمان نفسى أتعرف عليكى بجد عن قريب

ربنا يحميكى و يرزقك السعادة دايما

Dr Emad said...

كلامك مؤثر جدا جدا


واحساسك رائع جدا


وعلى فكره دى مشكلتى دايما
بحس بحزن من اى حاجه ممكن تجرح اى تصورجميل لاى حاجه ف حياتى
شعور بتحسى انه بيطاردك وبيرعبك


بس فى الاخر الشعور ده ممكن يبوظ اى لحظه جميله ف حياتنا




بجد حاسس بكلامك جدا
كتبتيه بشكل رائع

ساعه الغروب said...

مش عارفه اقولك ايه بجد
البوست رائع اوى لانه صادق اوى

و
وللاسف الخط الاسود دا بيكبر كل ما كبرنا

كانه اتولد معانا وحلف ما هو مفارقنا
ومهما لوناه باى لون تانى لونه الاسود الداكن اوى بيغلب اى لون


سورى اذا كان ردى كئيب شويه

بس ما عرفتش ازين الحقيقه

بجد البوست امتعنى

ربنا يسعدك

شكرا ليكى

basma saghir said...

تخاريف خاصى
مستنية رأيك في باقي المدونة..متتأخريش

ايمي
يالهوي يا ايمي على الكلام الي ياريت اكون استحق حتى ربعه
ربنا يكرمك...انا كمان نفسي نتعرف عن قرب

د\عماد
انا كان قصدي من الكلام ده ان رغم احساسنا بالحزن احنا ممكن نتغلب عليه لما نركز على الحاجات المفرحة الي في حياتنا
زيارتك بتسعدني دايما

ساعة الغروب
سعيدة جدا ان البوست امتعك..زي ماردك امتعني جدا جدا..
ومتحطيش في بالك موضوع كابة ردك دي مش مشكلة يعني
نهارك ابيض

انحلت سيور العربه وسقط المهر من الاعياء said...

جميل السرد مصاغ باسلوب اخاذ ياخذ لحنين الذكريات والاجواء الجميله التى افتقدناها تحت ضغوط الدخخان الكثيف المخيم على انفاسنا حتى لم نعد نستطيع الاستنشاق


وانا بقرا البوست حسيت انى بشم هو ا نضيف معرفيش ايه السبب
تحياتى

basma saghir said...

سعيدة بكلامك جدا..وسعيدة اكتر ان كلامي اثر فيك اثر ايجابي
وسعيدة كمان بمرورك

عمر بوك ستورز said...

زورونا تجدون ما يسركم .


قائمـة من الكتب الأدبية والثقافية والفكرية المتنوعة للعديد من دور النشر

تحت سقف واحد، وبأسعار لا تقبل المنافسة


وعيد أضحى ...كويس :)

ابو على said...

سلام عليكم:d
هههههههههههههههههه
طبعا ف سرك هاتقولى انت تانى
استحملينا شويه يا ستى لغايه لما نخلص البلوج بتاعك بوست بوست:d
المهم بجد طريقه كلامك عن اللوحه الى انتى رسمتيها جميله
حتى الخط الاسود ليها اكتر من مدلول
الا صحيح سؤال ع الماشى كده جمع مدلول ايه:d
ام هند
الخط دا ممكن تكونى رسمتيه بايدك ومش بايد حد تانى
مش عارف عندى احساس داخلى ان البنى ادم هو الى بيعمل كل حاجه لنفسه سواء الاتجاه للفرح او الحزن
او حتى الخياليه
يعنى مثلا انتى تعرفى حد ف حياتك كويس وبتاع وفعدين شوفتى العكس من الشخص دا واصريتى بايدك تكملى الحكايه
هانرجع ونقول احنا السبب برده عشان ادينا الفرصه لغيرنا انه يرسم جوانا الى هو عاوزه
تفرق ايه لما تمسكى ايد رسام عشان يرسم ف لوحتك وانك ترسمى بايدك
ماهى كل حاجه تحت سيطرتك من الاول
ما علينا مش هازود ف الكلام عن كده مع ان ليا كلام كتير اوى:d وزى ما قولتلك كل واحد وليه حريه ف التعبير
يلا سلام عليكم