سر الحياة-حاجات وبتفرح

الشمس ساعة الغروب..والقمر في نص الشهر العربي..النجوم...والغيوم لما تبقى كتيرة... نسمة باردة في يوم حر...الورد البلدي الاحمر لما يبقى مندي...الكوربة الصبح بدري..وريحة القهوة الي جاية من ميدان الجامع..

المصاصة الحمرا الي اخرها في لبانة..الشوكولاتة بالبندق...عصير المانجة في اغسطس..القطط اول ما تتولد..رسالة على الموبايل بتسأل عن الحال..مقابلة حد بنحبه من غير معاد

فيلمك المفضل في اخر يوم متعب...كراسة رسم فاضية والوان خشب...فنجان قهوة الساعة ستة الصبح...تلعب مع ناس اصغر منك ب 17 او 18 سنة كانك اصغر منهم ب17 او 18 سنة...تشكي همك لطفل مكملش سنة ونص وهو بيضحكلك ومش فاهم حاجة..

تسمع منير وفيروز في ساعة صفا...تلاقي حد يحبك وانت شعرك منكوش وعينك حمرا ولسة مغسلتش سنانك...تعمل حاجة لأول مرة من مدة طويييييلة جدا...تتكلم من غير ما تضطر تفكر الف مرة قبل ما تنطق...تبقى سعيد انك انت

تلاقي في حزنك ايد تطبطب عليك...وتلاقي في فرحك حد تقوله قد ايه انت فرحان...تحل مشكلة لحد قريب منك....ليلة العيد لما يبقى حيلنا مهدود من التنظيف ومع ذلك سهرانين بالبيجامات الجديدة مع مج كاكاو....البلالين الملونة..وصوت البمب الصبح...تكبيرة العيد ولما تحس ان الناس فجأة بقت واحد

تحلم حلم بليل وتصحى الصبح تلاقيه اتحقق...تسمع كان في فراشة صغننة بتاعة نيللي وتلاقي نفسك لسة حافظها...مكالمة بعد نص الليل مع حد قريب منك في اي كلام عبيط...

اسكندرية في اخر شهر مايو...شارع خالد بن الوليد بعد الساعة 9 بليل...المنتزه وقلعة قايتباي...مكتبة الاسكندرية...محطة الرمل...البحر الصبح...والبحر بليل...البحر في كل وقت

موسيقى هادية...ولب ابيض..وعصير تفاح...وبلكونة...الساعة واحدة الفجر

فاروق جويدة...نزار قباني...عبد الرحمن الابنودي..احمد فؤاد نجم...رفعت اسماعيل والبدلة الكحلية التي تجعله فاتنا...صلاح جاهين...سعاد حسني وخلي بالك من زوزو...الساحرة الصغيرة...صغيرة على الحب...ميكي ماوس ودونالد دك....توم وجيري

حديقة الازهر بعد المغرب...سما ومحمود وهما بياكلوا ايس كريم...انا وخالتو ومج الشاي بلبن بتاع اخر الليل
دريم بارك..والصريخ والضحك الي من القلب...غزل البنات البمبي...وسباق السيارات...والسفن اب الي بيدلق على الهدوم ومش بيبان علشان هو شفاف

لما تصحى قبل القجر وتقعد تتكلم مع ربنا وتشكيله همك وبعد ما تخلص تحس انك ارتحت...لما يبقى في حد واحشك قوي وبتفكر فيه كتير وتشوفه...الميني باص الي بيروحني البيت لما بيبقى فاضي واقعد من اول المشوار

لوزة و شيماء و هبة و ريهام و رشا و دعاء و نادين و هاجر...البت جوري بنت حسن وهدى... مهند ومحمود....الثلاثي المرعب..سماء ومريم و شذى...

دكتور ممدوح عبد العليم..اخر الرجال المحترمين....ابلة حنان...دكتور حسن غلاب الله يرحمه...ابلة فتحية....دكتورة ايمان السعيد...ابلة منال...دكتور احمد منصور...ابلة اسماء..دكتور الطيب محمود ..ابلة نوال...

المرجيحة الي بركبها في حديقة الازهر من غير ما حد اعرفه يعرف....اشوف كذا فيلم في السينما ورا بعض مع حد بحبه...مكتبة ديوان لما يبقى معايا فلوس.

تيمون وبومباو هاكونا مطاطا

ومنير لما بيقول:
مش كل شئ بيفوت في عمرنا بيجرح
قلب الحياة مليان..حاجات وبتفرح

ياليلة بيضا

ياالف ليلة بيضا

ورد عليه..فل عليه

عقبال عندكم جميعا...عقبال انجالكم..يعني اولادكم لغير الناطقين بالعربية

لولولولولوللييييييييييييييييييييييييي

لولولولولولولييييييييييييييييييييييييييي

يادبلة الخطوبة عقبالنا كلنا..ونبني طوبة طوبة في عش حبنا

نتهنى بالخطوبة ونقول من قلبناااااااااا..يادبلة الخطوبة عقبالنا كلنا

ياصورة في الخيال متغبش عننا..بداية الامال وعز فرحنا

شبكنا بدبلته وقرينا فاتحته وعرفنا نيته وغلاوته عندنا

يادبلة الخطوبة عقبالنا كلناااااااااااا

القلب طب في حب شاب..الشاب حب وراح خطب

ما الشابة حتة سكرة..ضفايرها محدوفة لورا

وشعرها لون الدهب..الشاب شاف فيها العجب..شيع لناس وراح خطب

ما الشابة حتة سكرة..الشابة حتة سكرة..سكرة... سكرة

القلب نور من الشمال ومن اليمين...لما انسقى من نظرتين..من نظرتين ولون العين بالحنين

هات عصير هنا يا ابني للناس دي...وانتي هاتي حاجة حلوة للناس الحلوين دول يحلوا بقهم...يا الف ليلة بيضا...الله يبارك فيكم..عقبالكم كدة ان شاء الله

اول مرة من فترة طويلة اشوفك فرحانة كدة واشوف لمعة عينك الي بقالها كتير مختفية...اول مرة من فترة طويلة اشوفك بتضحكي من قلبك...ولما بتكلميه وشك بيحمر زي الطماطم....حاساكي رجعتي تاني زي اول ما عرفتك

لو اي حاجة وحشة حصلت زمان عايزاكي تنسيها كأنها محصلتش اصلا...ولو اي حد جرحك عايزاكي تسامحيه...وتبصي قدام..لأن الي جاي اكيد هيكون احلى بكتير من الي راح ان شاء الله

ومش عايزين القلب يفضل يحترق كدة كتير...غيري الشعار في المرحلة الجاية والنبي يا اختشي..خليه مثلا القلب البمبة..القلب التركواز منقط بمبمة مثلا...او القلب الاخضر الكاروهات..حاجة كد يعني...لحسن الواد يتخض ويطفش

بحبك قوي وانتي عارفة...والف مبروك قلتها ولسة هقولها تاني...وكان نفسي ابقى معاكي بس انتي طبعا مقدرة ظروفي الصعبة جدا...واعملي حسابك اني هبقى قاعدة على قلبك في الفرح..جاية يعني جاية

:)

أعرفك بنفسي

تاج عرفني بنفسك..هو اسمه كدة...وصلني من منى..قلت والله التاجات ليها وحشة واسئلة ظريفة ولطيفة وخفيفة وبنت حلال ليه مجاوبش..اجاوب وماله هو انا صغيرة


لو أعطيتك ثلاث وردات .. من هم الثلاث الأشخاص اللى هتعديهم الورد الي معاك؟
واحدة ليا علشان بحب الورد:)
واحدة للراجل الي بيصحلي الكمبيوتر لما بيضرب علشان بيتعب معايا
واحدة للناس الي نظموا الاضراب


لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
اول سطر...ان الله لايغير ما بقوم حتى يغيروا ما بأنفسهم..القران
تاني سطر...الوقوف على عتبات البهجة دائما أفضل من البهجة نفسها..عاجباني قوي الجملة دي..عتبات البهجة
ثالث سطر...انت الحقيقة في دنيا زيف..لأي معنى جميل في حياتنا


ما هو هدفك فى الحياة ؟؟
هدفي الاعظم اني اعمل حاجة بحبها مش تقضية واجب وخلاص...وافيد الناس الي حواليا علشان ميبقاش وجودي من عدمه واحد


إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟
بحاول اقنع نفسي بيها واصدقها حفاظا على الصحة العقلية مش اكتر


أجمل مقولة سمعتها / سمعتيها فى حياتك ؟؟
رباعية لجاهين
يأسك وصبرك بين اديك وانت حر
تيأس ما تيأس الحياة راح تمر
انا دقت مندا ومندا عجبي لقيت
الصبر مر وبرضك اليأس مر
مأثرة فيا جدا ولازقة في دماغي بقالها سنة ونص تقريبا او اكتر


من المغنى اللى بتحبه أوى و إيه أحلى أغنية ليه بتحبها ؟؟
منير\فيروز
كلهم..كلهم


غزة" تمثل لك إيه فى حياتك ؟؟
اهانة تضاف الى قائمة الاهانات في حق العرب
خلاص..جسمنا نحس


أعطى لإنتمائك لوطنك درجة من مائة ؟؟
اكدب لو قلت اقل من 100 من 100


لو تزوجت / تزوجتى و أنجبت بنتين و ولدين أى الأسماء تختار لهم ؟؟
حاسة ان السؤال ده عدى عليا قبل كدة...اه ده فعلا عدى..علشان بس الملل والخنقة انزل تحت شوية وانت تعرف موضوع الاطفال ده في اخر تاج


عمرك غشيت فى أمتحان و انت صغير ؟؟
لأ غشيت وانا كبيرة..وانا صغيرة كنت صاحبة مبادئ :)


لو أتعرض عليك رشوة كبيرة و انت فى زنقة ماليه هتعمل إيه ؟؟
سؤال غير منطقي بالنسبة ليا..لأني لا ماسكة منصب مهم ولا موقعي حساس في الدولة وغالبا انا الي هدي الرشوة للموظف علشان يمشيلي شغلي :(
علشان انا لسة من طبقات الشعب المطحونة الحمد لله

يارب..شوية براح

لست ادري لماذا بهت لون الاشياء فجأة..اصبحت رمادية او بلا لون اطلاقا

ومن بعيد اسمع اغنية حزينة تحكي عن فراق عاشقين..تحكي عن الحزن عندما يتمكن منا

ووجوه فتيات نسيت اسطورة النهاية السعيدة منذ زمن...أو تناستها

واطفال يتسائلون...لماذا لا تتلون الاحزان كما اعتادت ان تفعل دوما

ونساء يبحثن عن بداية جديدة..لعلها تمسح جراح الماضي

وانا لم اعد ادري لماذا اصبحت الستائر بهذا العناد...تأبى ادخال ضوء الشمس ليعمل عمله المطهر

وفي فزع ندرك ان المساحات تضيق علينا...ولا تترك لنا الا جزء صغير..ضئيل..لكي نتنفس..فقط نتنفس

اتمنى ان تأتي لتبعد تلك الاشباح الرمادية...لكي تخيف الخوف...لكي تعيد الالوان الى العالم

كا الابطال الخارقين في قصص الاطفال المصورة

لكنك لا تأتي ابدا..لا تأتي وهذا مايفزعني اكثر

تضيق المساحات اكثر..ومع كل دقيقة لاتكون فيها معي..تضيق اكثر..واكثر

كأنك تعويذة ما....اتمسك بك لابعاد الخوف..بصوتك وكلامك...برائحتك

اه يابراح عمال بيضق

وبصوت هامس ادعو...يارب..شوية براح

اسفة...بحبك..وحشتيني

عارفة انك هتقولي اني بكتب كدة علشان عيد الام...لا والله ابدا انتي اصلا مش محتاجة حاجة تفكرني بيكي انتي في بالي على طول اصلا

اكيد مش هتصدقي وانا شكلي ملهية عنك بحاجات كتير..الدراسة..والمذاكرة واحيانا الشغل...بس بجد كل حاجة بعملها..بعملها علشانك..واي خطوة بخطيها مش بفكر في اي حاجة قبلها غير رد فعلك لما تعرفي..هتزعلي..هتفرحي..هتتفاجئي..هتتصدمي

يمكن مش بقولها كتير بس انا بحبك...انتي عارفة ده...وانا عارفة انك عارفة..لكن هي غلطة اني مش بقولها كتير..بحبك قوي..وبحب اتكلم معاكي و اهزر...بحب اخرج معاكي قوي وبحب لما تصممي انك تعزميني على درة مشوي وفي الاخر انا الي ادفع علشان نسيتي محفظتك في البيت...بحب اروح معاكي جلسة العلاج الطبيعي ونقعد نرغي هناك والمركز يبقى كله هادي ومفيش غير صوتنا احنا بس الي طالع

بحبك لما بتكشفيني لما ابقى كدابة وتقوليلي ياشييييييخة

وبحبك لما اخاف عليكي واقلق كأني امك وتقوليلي مين ام مين؟

اسفة على اي حاجة عملتها وضايقتك مني...اسفة على اني ببقى غبية ساعات ومش بشوف غير تحت رجلي...اسفة علشان بعلي صوتي وبتنرفز..اسفة علشان بخليكي تقلقي عليا بدون داعي....واسفة علشان بعتبرك امر مسلم بيه...وعلشان مش بقدرك...اسفة علشان بخبي عنك ساعات غصب عني...واسفة علشان في لحظة غباء شديد بشك في حبك ليا لجزء من الثانية

سامحيني علشان في وقت من الاوقات خيبت املك فيا...وهدمت كل أحلامك بخصوصي....سامحيني علشان احيانا مش بحس بيكي ولا بتعبك ولا بخوفك عليا

انتي وحشتيني قوي يا ماما ومش قادرة اقلك اني غلبانة جدا من غيرك...علشان متخافيش وتتخضي علينا...بس الحقيقة اني من غيرك مسواش بصلة في سوق البنات :)

ارجعي بسرعة...بس ارجعي لما تخفي..ده المهم عندي

الورقة البيضاء التي لم تعد بيضاء

لا ارتاح كثير لمنظر الصفحة البيضاء امامي...اشعر بعجز لامتناهي وانا احدق بها..تستهزئ بي وتضحك من قلة حيلتي..يراودني احساس بأني اعاني من اعراض قفلة..ماس كهربائي في رأسي..اغلق مفتاح النور ولا استطيع ان اجد لوحة تحكم الكهرباء في هذا الظلام..فيستمر..ويستمر..ويستمر...

اغلق عيناي فأرى الالوان ناصعة كما خلقت لتكون..واضحة صريحة...غيوم بيضاء..سماء زرقاء..اشجار خضراء...افتحهما فلا ارى سوى الظلام والصفحة البيضاء

افضل اغلاق عيناي مرة اخرى..هناك عالم اخر..قرية متواضعة فوق هضبة مرتفعة..بيوتها صغيرة لاتتعدى الدورين..حياة بسيطة ولكن مثيرة للاهتمام في نفس الوقت..هناك لا احد يدعي الطيبة..الناس طيبون بالفعل..ولا احد يقول عكس مايفعل..يقترن عندهم الفعل بالكلام..لايوجد فساد..ولا انحلال..هل هي يوتوبيا؟...لا اعتقد..هناك بعض المشكلات..هناك بعض الضغائن ولكن كلها تتبخر تلقائيا لا شئ يختزن..ولاشئ يبقى
هناك قلوب صغيرة تعيش الحب لأول مرة...وهناك قلوب تعيش الحب وكأنها المرة الاولى..وهناك من لم يعرف الحب يوما ولكنه سمع عنه وتمنى ان يقابله..وهناك من لايعرف ما هو الحب ولا مما يصنع

افتح عيني هذه المرة لأجد خيط رفيع جدا من الضوء...ولمحة من لون على الورقة البيضاء

اغلقهما مرة اخرى...لأن هناك عالم اخر ينتظر...سحب ملونة في كل مكان...الوان قاتمة...الوان فاتحة..سحب بيضاء..سحب مقلمة..و(كاروهات)...سحب بألوان القلب السعيد..وللقلب الحزين سحب ايضا..وجنيات صغيرات يقفزن من سحابة لأخرى..هذا بيتهن الذي لايعرفن غيره...يحاولن ان يسعدن من يشعر بالحزن...ويزيدن سعادة من يشعر بالسعادة اصلا...
هناك امير واميرة يعيشون في قصر كبير يحكمون عالمهم بحب وعدل واخلاص....نظرت لأعلى لاقرأ اسم هذا العالم مكتوب على لافتة عملاقة وردية اللون (ارادة السعاد) كان
هذا يكفيني لافتح عيني مرة اخرى..فأجد ان الظلام صار يغلف نصف الغرفة فقط...وان الصفحة البيضاء التي كانت تستهزئ بي ارتسم عليها قوس قزح صغير

الان سوف اغمض عيني مرة اخيرة واذهب لعالم اخر...الكوربة في الصباح الباكر...مازالت المحلات مغلقة مرهقة من ليلة امس المتعبة..لايوجد سوى ذلك المخبز الصغير ورائحة الخبز الطازج والكعك بالشكولاتة...تتسرب الرائحة الى الارواح واعدة بيوم سحري...يفتح المقهى ابوابه ويعلن اتحاده مع المخبز الصغير...ويبعثان معا روائح انتاجهم مغريين البشر بالاسيقاظ من سباتهم..ومن تعاستهم

قررت ان اجازف...فتحت عيني لأرى ان الغرفة تسبح في ضوء الشمس البرتقالي...وان الورقة البيضاء لم تعد بيضاء...كانت مليئة بالالوان والرسومات والكلمات والوجوه الضاحكة والحزينة..كانت مليئة..مليئة...والاجمل اني وجدت لوحة التحكم في الكهرباء التي سببت كل هذا الظلام...عندها عرفت ان الماس الكهربائي انتهى على خير..وان القفلة انتهت وان يوم جديد قد بدأ