حكاوي وتخاريف واشياء اخرى

Friday, April 11, 2008

أعرفك بنفسي

تاج عرفني بنفسك..هو اسمه كدة...وصلني من منى..قلت والله التاجات ليها وحشة واسئلة ظريفة ولطيفة وخفيفة وبنت حلال ليه مجاوبش..اجاوب وماله هو انا صغيرة

لو أعطيتك ثلاث وردات .. من هم الثلاث الأشخاص اللى هتعديهم الورد الي معاك؟
واحدة ليا علشان بحب الورد:)
واحدة للراجل الي بيصحلي الكمبيوتر لما بيضرب علشان بيتعب معايا
واحدة للناس الي نظموا الاضراب

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
اول سطر...ان الله لايغير ما بقوم حتى يغيروا ما بأنفسهم..القران
تاني سطر...الوقوف على عتبات البهجة دائما أفضل من البهجة نفسها..عاجباني قوي الجملة دي..عتبات البهجة
ثالث سطر...انت الحقيقة في دنيا زيف..لأي معنى جميل في حياتنا

ما هو هدفك فى الحياة ؟؟
هدفي الاعظم اني اعمل حاجة بحبها مش تقضية واجب وخلاص...وافيد الناس الي حواليا علشان ميبقاش وجودي من عدمه واحد

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟
بحاول اقنع نفسي بيها واصدقها حفاظا على الصحة العقلية مش اكتر

أجمل مقولة سمعتها / سمعتيها فى حياتك ؟؟
رباعية لجاهين
يأسك وصبرك بين اديك وانت حر
تيأس ما تيأس الحياة راح تمر
انا دقت مندا ومندا عجبي لقيت
الصبر مر وبرضك اليأس مر
مأثرة فيا جدا ولازقة في دماغي بقالها سنة ونص تقريبا او اكتر

من المغنى اللى بتحبه أوى و إيه أحلى أغنية ليه بتحبها ؟؟
منير\فيروز
كلهم..كلهم

غزة" تمثل لك إيه فى حياتك ؟؟
اهانة تضاف الى قائمة الاهانات في حق العرب
خلاص..جسمنا نحس

أعطى لإنتمائك لوطنك درجة من مائة ؟؟
اكدب لو قلت اقل من 100 من 100

لو تزوجت / تزوجتى و أنجبت بنتين و ولدين أى الأسماء تختار لهم ؟؟
حاسة ان السؤال ده عدى عليا قبل كدة...اه ده فعلا عدى..علشان بس الملل والخنقة انزل تحت شوية وانت تعرف موضوع الاطفال ده في اخر تاج

عمرك غشيت فى أمتحان و انت صغير ؟؟
لأ غشيت وانا كبيرة..وانا صغيرة كنت صاحبة مبادئ :)

لو أتعرض عليك رشوة كبيرة و انت فى زنقة ماليه هتعمل إيه ؟؟
سؤال غير منطقي بالنسبة ليا..لأني لا ماسكة منصب مهم ولا موقعي حساس في الدولة وغالبا انا الي هدي الرشوة للموظف علشان يمشيلي شغلي :(
علشان انا لسة من طبقات الشعب المطحونة الحمد لله

Tuesday, March 25, 2008

يارب..شوية براح

لست ادري لماذا بهت لون الاشياء فجأة..اصبحت رمادية او بلا لون اطلاقا

ومن بعيد اسمع اغنية حزينة تحكي عن فراق عاشقين..تحكي عن الحزن عندما يتمكن منا

ووجوه فتيات نسيت اسطورة النهاية السعيدة منذ زمن...أو تناستها

واطفال يتسائلون...لماذا لا تتلون الاحزان كما اعتادت ان تفعل دوما

ونساء يبحثن عن بداية جديدة..لعلها تمسح جراح الماضي

وانا لم اعد ادري لماذا اصبحت الستائر بهذا العناد...تأبى ادخال ضوء الشمس ليعمل عمله المطهر

وفي فزع ندرك ان المساحات تضيق علينا...ولا تترك لنا الا جزء صغير..ضئيل..لكي نتنفس..فقط نتنفس

اتمنى ان تأتي لتبعد تلك الاشباح الرمادية...لكي تخيف الخوف...لكي تعيد الالوان الى العالم

كا الابطال الخارقين في قصص الاطفال المصورة

لكنك لا تأتي ابدا..لا تأتي وهذا مايفزعني اكثر

تضيق المساحات اكثر..ومع كل دقيقة لاتكون فيها معي..تضيق اكثر..واكثر

كأنك تعويذة ما....اتمسك بك لابعاد الخوف..بصوتك وكلامك...برائحتك

اه يابراح عمال بيضق

وبصوت هامس ادعو...يارب..شوية براح

Friday, March 21, 2008

اسفة...بحبك..وحشتيني

عارفة انك هتقولي اني بكتب كدة علشان عيد الام...لا والله ابدا انتي اصلا مش محتاجة حاجة تفكرني بيكي انتي في بالي على طول اصلا

اكيد مش هتصدقي وانا شكلي ملهية عنك بحاجات كتير..الدراسة..والمذاكرة واحيانا الشغل...بس بجد كل حاجة بعملها..بعملها علشانك..واي خطوة بخطيها مش بفكر في اي حاجة قبلها غير رد فعلك لما تعرفي..هتزعلي..هتفرحي..هتتفاجئي..هتتصدمي

يمكن مش بقولها كتير بس انا بحبك...انتي عارفة ده...وانا عارفة انك عارفة..لكن هي غلطة اني مش بقولها كتير..بحبك قوي..وبحب اتكلم معاكي و اهزر...بحب اخرج معاكي قوي وبحب لما تصممي انك تعزميني على درة مشوي وفي الاخر انا الي ادفع علشان نسيتي محفظتك في البيت...بحب اروح معاكي جلسة العلاج الطبيعي ونقعد نرغي هناك والمركز يبقى كله هادي ومفيش غير صوتنا احنا بس الي طالع

بحبك لما بتكشفيني لما ابقى كدابة وتقوليلي ياشييييييخة

وبحبك لما اخاف عليكي واقلق كأني امك وتقوليلي مين ام مين؟

اسفة على اي حاجة عملتها وضايقتك مني...اسفة على اني ببقى غبية ساعات ومش بشوف غير تحت رجلي...اسفة علشان بعلي صوتي وبتنرفز..اسفة علشان بخليكي تقلقي عليا بدون داعي....واسفة علشان بعتبرك امر مسلم بيه...وعلشان مش بقدرك...اسفة علشان بخبي عنك ساعات غصب عني...واسفة علشان في لحظة غباء شديد بشك في حبك ليا لجزء من الثانية

سامحيني علشان في وقت من الاوقات خيبت املك فيا...وهدمت كل أحلامك بخصوصي....سامحيني علشان احيانا مش بحس بيكي ولا بتعبك ولا بخوفك عليا

انتي وحشتيني قوي يا ماما ومش قادرة اقلك اني غلبانة جدا من غيرك...علشان متخافيش وتتخضي علينا...بس الحقيقة اني من غيرك مسواش بصلة في سوق البنات :)

ارجعي بسرعة...بس ارجعي لما تخفي..ده المهم عندي

Wednesday, March 12, 2008

الورقة البيضاء التي لم تعد بيضاء

لا ارتاح كثير لمنظر الصفحة البيضاء امامي...اشعر بعجز لامتناهي وانا احدق بها..تستهزئ بي وتضحك من قلة حيلتي..يراودني احساس بأني اعاني من اعراض قفلة..ماس كهربائي في رأسي..اغلق مفتاح النور ولا استطيع ان اجد لوحة تحكم الكهرباء في هذا الظلام..فيستمر..ويستمر..ويستمر...

اغلق عيناي فأرى الالوان ناصعة كما خلقت لتكون..واضحة صريحة...غيوم بيضاء..سماء زرقاء..اشجار خضراء...افتحهما فلا ارى سوى الظلام والصفحة البيضاء

افضل اغلاق عيناي مرة اخرى..هناك عالم اخر..قرية متواضعة فوق هضبة مرتفعة..بيوتها صغيرة لاتتعدى الدورين..حياة بسيطة ولكن مثيرة للاهتمام في نفس الوقت..هناك لا احد يدعي الطيبة..الناس طيبون بالفعل..ولا احد يقول عكس مايفعل..يقترن عندهم الفعل بالكلام..لايوجد فساد..ولا انحلال..هل هي يوتوبيا؟...لا اعتقد..هناك بعض المشكلات..هناك بعض الضغائن ولكن كلها تتبخر تلقائيا لا شئ يختزن..ولاشئ يبقى
هناك قلوب صغيرة تعيش الحب لأول مرة...وهناك قلوب تعيش الحب وكأنها المرة الاولى..وهناك من لم يعرف الحب يوما ولكنه سمع عنه وتمنى ان يقابله..وهناك من لايعرف ما هو الحب ولا مما يصنع

افتح عيني هذه المرة لأجد خيط رفيع جدا من الضوء...ولمحة من لون على الورقة البيضاء

اغلقهما مرة اخرى...لأن هناك عالم اخر ينتظر...سحب ملونة في كل مكان...الوان قاتمة...الوان فاتحة..سحب بيضاء..سحب مقلمة..و(كاروهات)...سحب بألوان القلب السعيد..وللقلب الحزين سحب ايضا..وجنيات صغيرات يقفزن من سحابة لأخرى..هذا بيتهن الذي لايعرفن غيره...يحاولن ان يسعدن من يشعر بالحزن...ويزيدن سعادة من يشعر بالسعادة اصلا...
هناك امير واميرة يعيشون في قصر كبير يحكمون عالمهم بحب وعدل واخلاص....نظرت لأعلى لاقرأ اسم هذا العالم مكتوب على لافتة عملاقة وردية اللون (ارادة السعاد) كان
هذا يكفيني لافتح عيني مرة اخرى..فأجد ان الظلام صار يغلف نصف الغرفة فقط...وان الصفحة البيضاء التي كانت تستهزئ بي ارتسم عليها قوس قزح صغير

الان سوف اغمض عيني مرة اخيرة واذهب لعالم اخر...الكوربة في الصباح الباكر...مازالت المحلات مغلقة مرهقة من ليلة امس المتعبة..لايوجد سوى ذلك المخبز الصغير ورائحة الخبز الطازج والكعك بالشكولاتة...تتسرب الرائحة الى الارواح واعدة بيوم سحري...يفتح المقهى ابوابه ويعلن اتحاده مع المخبز الصغير...ويبعثان معا روائح انتاجهم مغريين البشر بالاسيقاظ من سباتهم..ومن تعاستهم

قررت ان اجازف...فتحت عيني لأرى ان الغرفة تسبح في ضوء الشمس البرتقالي...وان الورقة البيضاء لم تعد بيضاء...كانت مليئة بالالوان والرسومات والكلمات والوجوه الضاحكة والحزينة..كانت مليئة..مليئة...والاجمل اني وجدت لوحة التحكم في الكهرباء التي سببت كل هذا الظلام...عندها عرفت ان الماس الكهربائي انتهى على خير..وان القفلة انتهت وان يوم جديد قد بدأ

Thursday, February 28, 2008

لمة بنات

ايه رأيك في اللوك الجديد؟
تجنني والله
بجد؟
وحياتك عندي تجنني
طب تعالي اضبط نفسي في الحمام شوية قبل ما يجي
بقلك تجنني
معلش..انا خايفة يتصدم لما يشوفني
..................................................

بجد نفسي اتجوز واحد طويل وعريض
لأ..بلاش تقولي كدة
ليه..دي احلام
برضو بلاش..كل الي اتمنوا كدة اتجوزوا واحد قزعة وقصير
!!!!
...................................................

عايزاكي تنزلي معايا بكرة
على فين العزم ان شاء الله
عايزة اشتري جزمة
تااااااني؟...انتس مش لسة مشترية واحدة من اسبوع
عادي بقى..انا مريضة بالجزم وانتي كصديقة واجبك انك تقفي معايا
ربنا يشفي
.....................................................

كلمني...شكرا
انتي مش هتبطلي الرسالة دي بقى...يارب يلغوها
ايييييه في ايه مكسلة اقوم من تحت البطانية واكلمك
يعني انا الي مش مكسلة

اه بس انا ارفع منك بكتيير والبرودة بتأثر فيا اكتر منك

افحمتيني بصراحة

ميرسي
.....................................................

الواد ده أمور قوي
الا صحيح قوليلي
خير؟
هي أمور بالالف ولا بالقاف؟
ربنا يهديكي ياحبيبتي ارحمي امي بقى
................................................................

خسي شوية بقى علشان تبقي زي المزة دي
مين قالك بقى اني عايزة ابقى مزة؟
كل البنات عايزين يبقوا مزز
طيب شايفة الراجل ده؟
ماله؟
اراهنك انه لما هيعدي هيعاكسني
لما نشوف
"أموت انا في الشكولاتة"
شفتي...يابنتي انا مزة كما خلقت المزة لتكون
................................................................................

كلميها بقى...عايزين نروح نباركلها وبالمرة نتفرج على شقتها

طيب على اخر الاسبوع كدة
ااااه وبالمرة نشوف الي بيتجوزوا دول شكلهم
ايه يابت الحرمان ده...عمرك ماشفتي حد متجوز
لا بس دي وضع خاص
اشمعنى؟
علشان دي من شلتنا....وكل سنة وانتي طيبة..ويارب بقى فك عقدتنا
ههههههههههههههههههههههههههههههههههه
........................................................................

بحب محمد منير قوي في اغنية لولا السهر
اشمعنى؟
علشان لما بيقول: النجمة البعيدة..شافتني وحيدة جات تسأل عليا وباست عينيا..قالت لي حبيبك باعتلك هدية..بيقولك بحبك قد الدنيا ديا...قالتلي حبيبك باعتلك هدية بيقولك بحبك.بحبك..بحبك قد الدنيا ديا...بحس انه بيقولي انا بحبك
ياضنايا يابنتي..صعبتي عليا...بحبك بحبك بحبك
.............................................................

هو بيبصلي كدة ليه؟
عادي ياماما...يمكن معجب ولا حاجة لاسمح الله
ايه ده....ده جاي علينا
"لو سمحتي فين شؤون الطلبة"
المبنى الجاي
"شكرا"
مش قلتلك معجب..معجب جدا
ههههههههههههههههههههههههه
.........................................................................

انا تطنشني ومتردش عليا...بس لما اشوفها
يمكن ما اخدتش بالها
لالالالا بجد بجد لن انسى لها هذا الموقف..ده احنا عشرة 6 سنين..كدة عيب
طب وريني الموبايل كدة ونحاول نكلمها تاني
كليمها انتي..انا لساني مش هيخاطب لسانها ليوم الدين
ايه ده؟
في ايه؟
ده مش رقمها يا اذكى اخواتك
مش رقمها...انا خبطت في الحلل مش كدة؟
حكمتك يارب!!!

..........................................................................

تعالي بقى نروح جيم ونلعب ايروبيكس شوية
ياصلاة النبي..مين الي هيعمل كدة ان شاء الله
احنا
اااااه..مع نفسك ياماما
يابنتي خليني نروح نفك الكبت الي عندنا شوية بدل ماننفجر
كبت ايه بس يا حبيتي..دي كلها اوشاعات
مفيش كبت يعني؟
لا
أمال ايه كمية الاكل الغريبة الي عمالة تاكليها دي؟
ايه جعانة
..........................................................................

على فكرة انا بحبه قوي وكل حاجة بكتبها بكتبها عليه
دي حاجة كويسة وظاهرة صحية على فكرة
لا انا حاسة اني مش كويسة..حاسة اني بتسحب..بتخطف
وليه كل ده؟
بحبه
المصيبة بقى انه عبيط ومش دريان
اه هو فعلا عبيط
..........................................................................

عارفة نفسي في ايه في عيد الحب الجاي
استغفر الله العظيم..في ايه؟
نفسي في معجب مجهول يبعتلي كل يوم في ورد احمر...وهدايا مش لازم تكون غالية قوي بس اكون بحبها..وانا اعمل نفسي متنرفزة بس من جوايا هبقى طايرة من الفرح...مش انتي كمان نفسك في كدة؟
ياحبيبتي كلنا نفسنا...بس للاسف محدش بقى يفكر كدة..بدل فلوس الورد هيقول ما اجيب بيه حاجة تنفعني احسن ولاحتى اتنين كيلو تفاح
منك لله...انا غلطانة الي بتكلم مع واحدة زيك
..........................................................................

معرفش ليه حاسة اننا مش هنكمل مع بعض
ليه...مش هو ده الي كنتي بتقولي فيه معلقات؟
مش عارفة بقى..مفيش اي نوع من انواع الحوار بينا
خالص
خالص؟..

.المفروض اني ابقى اقرب انسانة ليه..بس هو حتى الحاجات الي مضيقاه مش بيرضى يحكيهالي
يمكن من عايز يضايقك ويشغلك
محدش قاله يعمل عليا وصي..وانا مش تمثال كريستال هيتكسر مع اول مواجهة مع المشاكل..انا جامدة
اقلك...ابعتيله جواب
تصدقي فكرة...بس يارب ميقولش عليا هطلة
ههههههههههههههههههههههههههههههه
........................................................................

هنجيبلها ايه بقى؟
نجيبلها ايه في ايه...مش فاهمة
يعني هندخل عليها وايدينا فاضية...ميصحش
انا مش هدفع اكتر من عشرين جنيه..اه...انا مش حمل المصاريف دي
يخرب بيت النتانة ياشيخة
مانتي اصلك مش فاهمة حاجة
وحياة ابوكي تفهميني
مهو انا لازم اجيب طقم جديد البسه وانا رايحلها..مش معقولة هروحلها بطقم قديم..علشان الواحد برضو يدخل بقيمته وكمان علشان متشوفش نفسها علينا وتفتكر نفسها ياما هنا ياما هناك علشان اتجوزت
يخرب بيت دماغك..فيها ايه دماغك دي..جزمة قديمة؟
.............................................................................

انتي يابت انتي على فكرة مبتعرفش تلبسي
اشمعنى؟
ايه الي انتي لابساه ده؟
ماله...عادي يعني
عامل زي لبس فاتن حمامة في مسلسل ضمير ابلة حكمت...انا لازم اعملك تغيير جذري في شكلك العفش ده
تصدقي بالله...فكرتيني بجويل في برنامج بالصراحة احلى
ههههههههههههههههههههههههههههههههههههههه
....................................................................................

الو
ايوة
ايه ده....مال صوتك...انتي معيطة؟
لا
تبقي معيطة...مالك؟
تعبانة قوي..حاسة اني لوحدي خالص..محدش معايا
لوحدك ازاي يابطة...واحنا رحنا فين...بطلي هبل وحياة ابوكي
انا بحبك قوي على فكرة
وانا كمان بحبك على فكرة
........................................................................

نفسي افرح..مش عارفة افرح...كل حاجة حواليا بتخنقني..حاسة اني بقيت لوحدي من ساعة ماسابني..ضعيفة..هشة قوي..كل حاجة بتجرحني
يابنتي ابوكي ده من اهل الجنة وهيبقى جار الرسول ان شاء الله علشان ربى بنتين واحسن تربيتهم
يارب
الله يرحمه
وليه بقى البوسة دي؟
مش عارفة..يمكن صعبتي عليا...ويمكن بحبك..ويمكن من غير سبب خالص
ميرسي
اي خدمة
.................................................................

بسمة...بسمة...بتعملي ايه؟
ولاحاجة..بكتب كل كلمة بنقولها
ليه يابت..ناوية ترفعي علينا قضية؟
لا..بس حاسة انكم مهمين قوي لدرجة اني اكتب كل حاجة احنا بنقولها...وانا بحبكم
ايه الكلام ده يابت...انتي بتقولي شعر
والنبي والنبي متبوظوش اللحظة الشاعرية دي
شاعرية بالسكر...هع هع هع هع هع هع هع هع
......................................................................

Thursday, February 21, 2008

ليلة ما

مقهى نجيب محفوظ في حي الحسين
الثامنة والنص مساء

جو من الحميمية الشديدة يغلف المكان...ودخان معسل التفاح والعنب متجمد في هواء المقهى كأنه سحب صغيرة...ومجموعة من الناس المختلفين اتفقوا على امضاء الامسية في رواية لنجيب محفوظ...والدفء يتسلل الى ارواحنا ويجعلنا نحلم بعوالم اخرى ....وكلما ازدادت البرودة في الخارج..ازددنا دفئا

يأتي الصوت النشاز-لكن المحبب- لعازف القانون وهو يتغنى باغنية ما لام كلثوم..يغريني صوته بأن اضع ساقي تحتي وارمي برأسي على كتف من يجلس بجانبي واستغرق في نوم عميق بلا احلام ولكن تتخلله اغنية لأم كلثوم...واتذكر اني كنت احسبها رجل وانا صغيرة لقوة صوتها

مقهى لنجيب محفوظ...اعجبتني الفكرة ربما لاني معجبة بنجيب محفوظ وربما لان المقهى قطعة من حارة نجيب محفوظ التي اعشقها وربما لان فكرة ان تدب الحياة في رواية له استهوتني
تملئ صوره المكان..وتتناثر رواياته على كل رف وكل طاولة وهي بالتأكيد ليست ديكور فارغ ولكنها روح المكان فتبدو الروايات في ايدي رواد المقهى اجمل من اي وقت مضى

وصل السحلب الذي طلبته اخيرا..لم تكن اول مرة لي في شرب السحلب ولكنها كانت المرة الاولى التي اشرب شيئا يتسرب الى الروح بتلك السهولة...يبعث فيها الدفء ويذكرها بأشياء كانت قد نسيتها او تناستها منذ زمن
انضم عازف الرق بصمت لعازف القانون-قانونجي كما يطلق عليه ابي-وبدخلوه الى النوتة استطعت ان اميز ان الاغنية هي حيرت قلبي معاك...

سرعان ما تشغل جميع الطاولات في المقهى...روادها خليط عجيب من البشر منهم مصريين..خليجين...وغربيين من جميع الجنسيات
يصر ذلك الولد الاشقر الذي حسبته في بادئ الامر اشيب الشعر ان يرقص على عزف القانون...فتنهره امه بلغة لا اعرفها ولكني اعرف من لون شعرهم الاشقر الاقرب الى البياض...وبشرتهم شبه الشفافة وعيونهم التي بلون السماء ولون خضرة الاشجار ...انهم من احد تلك الدول الاسكندنافية الباردة وانهم اتوا الى هنا بحثا عن الدفء الذي يتسرب الى الروح مثلي

تزداد سحب الدخان مع زيادة اعداد المدخنين ولكن لا احد يبالي ولا احد يعترض...فقد وقعنا جميعا تحت سحر ذلك المقهى وذلك القانونجي وتلك الروايات التي يضعونها على الطاولات على سبيل الفخ للزبائن...ولكني كجميع من في المقهى ارحب بذلك الفخ...ارحب بذلك الجو...ارحب بالسحلب وبرائحة معسل التفاح...ارحب بالنظرة البلهاء على وجوه السائحين وهم يستمعون الى اغاني ام كلثوم...ارحب بالاثار التي تتركها سهرة كتلك السهرة على ارواحنا...ارحب بالسعادة التي تتسلل ببطئ و خبث الى قلوبنا...ارحب باعادة اكتشاف الاشياء البسيطة في حياتنا